Sergeı Kýlagın bilim mekemeleriniń jertólesindegi qazandyqtardy jeke shyǵarýdy tapsyrdy
ASTANA. QazAqparat - Aqmola oblysynyń ákimi Sergeı Kýlagın 9 qańtar kúni ótken apparattyq jınalys barysynda 13 bilim berý mekemesiniń jertólelerinen qazandyqtardy shyǵarý boıynsha arnaıy komıssııa qurýdy tapsyrdy, dep habarlaıdy QazAqparat óńir basshysynyń baspasóz qyzmetine silteme jasap.
Keńes barysynda aımaq basshysynyń orynbasary Vladımır Balahontsev oblystyń kóp qabatty turǵyn úıleri men bilim berý, densaýlyq saqtaý nysandaryn jylýmen qamtý boıynsha aǵymdaǵy jaǵdaıdy baıandady.
«Áleýmettik jáne kommýnaldyq sharýashylyq salalary nysandaryndaǵy qazandyqtarda jumystar shtattyq rejimde júrgizilýde. Búgingi kúni oblys boıynsha kómir qory 206,9 myń tonnany quraıdy, bul 2 aılyq qajettiliktiń 144 paıyzy. Oblystaǵy mazýt qory 7 myń tonnany nemese aılyq qajettiliktiń 122 paıyzyn quraıdy. «AREK» AQ jáne «Kókshetaý Energo» JShS jylýmen qamtý jelilerinde jylýmen qamtamasyz etýdiń bekitilgen rejiminen aýytqýshylyqtar tirkelmegen»,- dedi ol.
Oblys ákimi Sergeı Kýlagın jertólelerden qazandyq qondyrǵylaryn bólek shyǵarý boıynsha jumystardyń barysyn da surady.
«Bilim nysandary boıynsha, 2012 jyly bilim berý mekemeleriniń ǵımarattarynan qazandyqtardy bólek shyǵarýdyń kezeńdik jospary qurastyrylǵan. Josparǵa sáıkes, sońǵy 3 jylda 70 bilim berý mekemesi óz qazandyqtaryn jeke shyǵarý boıynsha jalpy sommasy 1 mlrd teńgeniń jumystaryn júrgizdi. Búginde 13 bilim berý jáne 1 densaýlyq saqtaý mekemesiniń jertólesindegi qazandyqtar bólek shyǵarýdy qajet etedi. Dál qazirgi kúni Eńbekshilder aýdanynyń Makınka aýylynda dárigerlik ambýlatorııa qazandyǵynyń jobalyq-smetalyq qujattamasy daıyndalý ústinde, jumystar 2017 jylǵa josparlanǵan», - dep qosty Vladımır Balahontsev.
S.Kýlagın osy másele boıynsha shuǵyl túrde arnaıy komıssııa qurýdy tapsyrdy.
«Aǵymdaǵy jyly oblystyń 13 bilim berý nysanynyń jertólesindegi qazandyqtardy ǵımarattardan bólek shyǵarý úshin bıýdjetten qarjy qarastyryp, jobalyq-smetalyq qujattama daıyndaý qajet», - dep tapsyrdy oblys basshysy jaýapty laýazymdy tulǵalarǵa.
