Sergeı Kýlagın aqmolalyq aýyl sharýashylyǵy ónimin óndirýshileriniń basty maqsatyn atady

KÓKShETAÝ. QazAqparat - Búgin oblystyq máslıhat depýtaty Ǵalymbek Baımyshevtyń tóraǵalyǵymen besinshi shaqyrylǵan Aqmola oblystyq máslıhatynyń kezekti otyz besinshi sessııasy bolyp ótti. Sessııa jumysyna oblys ákimi Sergeı Kýlagın men Qazaqstan Respýblıkasy Parlamenti Senatynyń depýtaty Jabal Erǵalıev jáne oblystyq máslıhat hatshysy Nına Dıachek qatysty.

Sessııaǵa sondaı-aq, oblystyq máslıhat depýtattarynan basqa oblys ákiminiń orynbasarlary, aýdan ákimderi, basqarmalar basshylary men aýdandyq máslıhattardyń hatshylary, buqaralyq aqparat quraldarynyń ókilderi de qatysty. Aldymen, óńirdegi agroónerkásiptik keshenniń qaıta óńdeý salasynyń qazirgi jaǵdaıy men ony ary qaraı damytý perspektıvalary jóninde oblystyq aýyl sharýashylyǵy basqarmasy basshysynyń mindetin atqarýshy Dımash Talaspaev sóz alyp, byltyrǵy jyly aımaqta 45,9 mıllıard teńgeniń ónimi óndirilgendigin aıtty. Sońǵy tórt jylda un óńdeý 60, al suıyq maı óndirisi 25 paıyzǵa joǵarylaǵan. Degenmen sút, et pen un ónimderin óńdeýshi kásiporyndar óndiristik qýattylyǵyna shyǵa almaı otyrǵan jaıy bar.

Budan keıin sóz alǵan oblystyq máslıhattyń agrarlyq máseleler jáne ındýstrııalyq-ınnovatsııalyq damý jónindegi turaqty komıssııasynyń tóraǵasy osy óńdeýshi kásiporyndardaǵy jaǵdaıdy saralaý maqsatynda atalǵan komıssııa músheleriniń 26 nysanda bolǵanyna toqtaldy. Onyń aıtýynsha, búginde óńdeýge qajetti sapaly shıkizat tapshy. Sondyqtan da sút-taýarlyq fermalardy kóptep ashqan jón. Oǵan jergilikti bıýdjet esebinen qarajat qarastyrǵan durys. Ol qarjyny aýyl sharýashylyǵy ónimderin óńdeýshi kásiporyndarǵa berý jáne júz paıyzdyq qaıtaryp alý kepildigi jasalýy qajet. Ekinshi másele - jeke sharýashylyqtardaǵy, ıaǵnı, qarapaıym aýyl turǵyndarynyń qolyndaǵy mal basyn kóbeıtý. Jasyratyny joq, qazir qoldaǵy mal sany azaıyp barady, sonyń saldarynan sút zaýyttary sútke jarymaı otyr. Óıtkeni, olar sútti jekeden arzanǵa alǵysy keledi. Qazir sút baǵasy 2012 jyly qoıylǵan 45 teńge mólsherinde saqtalǵan. Inflıatsııa men baǵanyń ósimi eskerilmeı otyr. Endi ony kem degende 60-65 teńgege joǵarylatqan abzal. Sonda ǵana turǵyndar maldy ustaýǵa ketken shyǵyndy óteı alady. Bul tusta sút qabyldaýshylardyń ár aýyldy ózara bólip alyp, ashyqtyq pen adal básekelestikke jol bermeı otyrǵany taǵy bar. ıAǵnı, osy naryqty tek óz paıdalaryna beıimdep alǵan. Osy oraıda, aýyldyq óndiristik kooperatıvterdi qurýdyń sol azaıyp bara jatqan mal basyn kóbeıtýge, oǵan memleketten barynsha kómek alýǵa septigi tıer edi.

Aýyl sharýashylyǵy ónimderin óńdeýmen aınalysatyn óńirdegi iri kásiporynnyń biri - «Astana Agroprodýkt» jaýapkershiligi shekteýli seriktestiginiń basshysy Serik Rahymbaev 250 adamdy jumyspen qamtyp otyrǵandyǵyn, ortasha jalaqynyń 92 myń teńgeni quraıtyndyǵyn aıtty. Reseıden kelip jatqan arzan et ónimderiniń moldyǵyna qaramastan, seriktestik jyl saıyn ónim kólemin arttyrýda. Áıtkenmen jol, sý men aýyldarda jumys isteıtin jumysshylarǵa baspananyń joqtyǵy sııaqty kúrmeýi qıyn máseleler de bar. Aqkól aýdandyq máslıhatynyń hatshysy Juldyzaı Salybekova da sóz alyp, aýdannyń aýyl sharýashylyǵy ónimderin óńdeýge den qoıǵanyn birneshe kásiporynnyń mysalynda kórsetip berdi. Osy tusta óńir basshysy atalǵan aýdandaǵy sút zaýytynyń nebary 30 paıyzdyq qýattylyqpen jumys istep jatqandyǵyn jáne bul máseleniń aımaqtaǵy kóptegen kásiporynǵa tán jaǵdaı ekenin atap ótip, barlyq aýdan ákimderine jaǵdaıdy retke keltirý úshin naqty syzba, jospar, jobalardy ázirleýge on kún ýaqyt berdi. ıAǵnı, bılik ónimniń qaıda óńdelip, qaıda tasymaldanyp, qaıda satylatyndyǵyn rettep otyrady.

«Bizdiń kásiporyndardyń tolyq qýattylyǵyna shyǵa almaýyna Reseıden ne basqa jaqtan kelip jatqan arzan ónimder kináli deý tek syltaý ǵana. Bul jaǵdaı búgin ǵana paıda bola qalǵan joq. Buryn da bolǵan. Sondyqtan da, ózimiz ósý jaǵyn oılaıyq. Bizge Astananyń naryǵyn 100 paıyzǵa jaýlap alý da mindet emes. Elordalyqtarda da tańdaý quqyǵy bar ǵoı. Biraq, bul kórsetkishti kem degende 65 paıyzǵa jetkizý basty maqsatymyz bolýy kerek», - dedi óz sózinde Sergeı Kýlagın.