Sergeı Hıjnıchenko Belarýs fýtbol klýbyna aýysty
ASTANA. QazAqparat - Qazaqstandyq fýtbolshy Sergeı Hıjnıchenko Belarýs eliniń «Shahter» komandasyna aýysty. Bul týraly solıgorskilik klýbtyń resmı saıtyna silteme jasap «vesti.kz» saıty habarlady.
25 jastaǵy shabýylshy «Shahter» komandasymen erkin agent retinde kelisimshartqa otyrdy. Merzimi men jalaqysy týraly aqparat jarııalanǵan joq.
Sońǵy ret Qostanaıdyń «Tobyl» komandasynda oınady. 28 oıynǵa qatysyp, 10 gol soqty.
- «Shahter» - Belarýs birinshiliginde óner kórsetetin myqty klýbtardyń biri. Komanda únemi úzdik úshtiktiń qatarynan kórinip júr. Klýbtyń alǵa qoıǵan maqsattary da bıik. Maǵan osyndaı bıik maqsat qoıatyn klýbtar unaıdy. Sondyqtan da "Shahter" basshylary usynys jasaǵan kezde, men birden kelisimimdi berdim, - dedi Sergeı Hıjnıchenko «Shahter» klýbynyń resmı saıtyna bergen suhbatynda.
Sergeı Hıjnıchenko úshin Solıgorskiniń «Shahter» fýtbol klýby mansabyndaǵy ekinshi sheteldik komanda. Shabýylshy 2015 jyly Polshanyń «Korona» komandasynda oınaǵan.
Aıta keteıik, «Shahter» Belarýs elindegi tanymal fýtbol ujymdarynyń biri. Ótken maýsymda ishki birinshilikte ekinshi oryn aldy. Komanda óz tarıhynda 5 ret kúmis júldeger, 6 ret qola júldeger atanǵan. 2005 jyly chempıon da atanǵan.
