Sergeı Derevıanchenko kásibı rıngtegi alǵashqy jekpe-jegin jeńispen bastady
ASTANA. QazAqparat - Ýkraındyq boksshy Sergeı Derevıanchenko kásibı rıngtegi sporttyq mansap jolyn jeńispen bastady, dep habarlady Vesti.kz.
S.Derevıanchenko kásibı rıngtegi alǵashqy judyryqtasýyn amerıkandyq boksshy Kromvell Gordonǵa qarsy ótkizgen bolatyn. Jekpe-jek 6 raýndqa sozylýy tıis edi. Alaıda, ekinshi raýndtan keıin amerıkandyq boksshy kezdesýdi odan ary jalǵastyrýdan bas tartty. Osylaısha, ýkraındyq sportshy kásibı bokstaǵy birinshi jeńisine qol jetkizse, buǵan deıin 15 kezdesý ótkizgen amerıkandyq osymen 11-shi ret jeńilistiń aşy dámin tatty.
Esterińizge sala keteıik, osy jyldyń mamyr aıynda «Astana arlans» klýbynyń boksshysy, Búkilálemdik boks serııasynyń (WSB) eki márte chempıony Sergeı Derevıanchenko kásibı boksqa aýysqan edi. Ol Fight Promotions inc. jáne Dibella kompanııalarymen kelisimshartqa otyrǵan bolatyn.
