Sergeı Bezrýkov qazaq búldirshinin qutqarý úshin sýretin aýktsıonǵa shyǵardy

ASTANA. QazAqparat - Youtube saıtynda Reseıdiń tanymal kıno jáne teatr ártisi, Gýbern teatrynyń kórkemdik jetekshisi Sergeı Bezrýkovtyń 40 sekýndyq vıdeosy paıda boldy. Osy qyryq sekýnd ishinde ártis Ádemi esimdi qazaq búldirshinin aýyr syrqattan qutqarýǵa árekettengen, dep habarlaıdy QazAqparat tilshisi.

«Birneshe jyl buryn osynda, Qazaqstanda  «Shynaıy ertegi» degen balalarǵa arnalǵan fılmimdi tanystyrǵan edim. Sol kezde qoltańbamdy qaldyrǵan sýret shyqty. Endi myna sýret Ádeminiń emine jetpeı turǵan qarajatqa satylady dep úmittenemin. Qaıyrly is úshin satamyn...», - deıdi vıdeoda Sergeı Bezrýkov.

BAQ-tardyń habarlaýynsha, Sergeı Bezrýkovtyń qoltańbasy qoıylǵan portrettiń bastapqy quny - 35 000 teńge. Aýktsıondaǵy bir qadam 1000 teńge. Aýktsıon 20 qazan kúni qorytyndylanady.

Aıta keteıik, Almatyda týǵan Ádemi Qýanyshbek eki jasta. Búldirshin qaterli isikke shaldyqqan. Ońtústik Koreıada jasaıtyn operatsııa úshin 423 myń dollar jınaý kerek. Qazir ata-anasynyń qolynda 91 myń dollar bar.