Sergeı Arhıpov órt kezinde qaza bolǵandardyń tizimine engizilmeıdi – Bas prokýratýra

ASTANA. QazAqparat – Abaı oblysynda qaıtys bolǵan Sergeı Arhıpov Semeı ormanyndaǵy órtten qaza bolǵandardyń tizimine engizilmeıdi. Bul týraly QR Bas prokýrorynyń orynbasary Jandos Ómirálıev aıtty, dep habarlaıdy QazAqparat tilshisi.

«Sergeı Arhıpovtyń denesi men traktory órt bolǵan aýmaqtan basqa jerde tabyldy. Ol órt saldarynan qaza bolmaǵan», - dedi J. Ómirálıev búgin Májilistiń jalpy otyrysynan keıin tilshiler suraǵyna jaýap bere otyryp.

Bul turǵyda ol S. Arhıpov órt kezinde mert bolǵan 14 adamnyń sanatyna kirmegenin aıtty.

«Memleket basshysy zardap shekkenderge jan-jaqty kómektesý tapsyrmasyn berdi. Sondyqtan bul baǵyttaǵy kómek kórsetýdi oblystyq ákimdik, kásipkerler qarastyrady», - dedi Jandos Ómirálıev.

Esterińizge sala ketsek, Instagram-daǵy paraqshalardyń birinde Sergeı Arhıpov Abaı oblysy aýmaǵyndaǵy órtti sóndirýge kómektesý úshin traktorymen shyǵyp ketip, iz-túzsiz ketkeni týraly aqparat taraǵan bolatyn. Ol sońǵy ret 9 maýsym kúni habarǵa shyqqan.

Aldymen onyń traktory tabyldy. Keıin, 10 maýsym kúni 36 jastaǵy S.Arhıpovtyń denesi anyqtaldy. Júrgizilgen sot-medıtsınalyq saraptamanyń qorytyndysyna sáıkes er adamnyń ólimi júrek aýrýynan - kardıomıopatııadan bolǵany anyqtaldy.