«Sergektiń» ornyna BAÁ kompanııasynyń kelýi: baqylaý kimderdiń quzyrynda bolady

ASTANA. KAZINFORM — Jyl basynda «Sergek» elordadan ketip jatqany, qaladaǵy kameralardy BAÁ kompanııasy basqaratyny habarlandy. Osy oraıda Astana ákimdigi bul baǵyttaǵy jumystarǵa túsinik berdi.

- Jyl basynda Astana tsıfrlandyrýdyń jańa kezeńine qadam basty, «Smart City Astana» jobasy iske qosyldy. Onyń maqsaty - jasandy ıntellekt tehnologııalarynyń kómegimen qalany qaýipsiz, qolaıly jáne zamanaýı etý. Atalǵan jobanyń tehnologııalyq seriktesi retinde álemniń túrli elderinde osyndaı jobalardy júzege asyryp júrgen Birikken Arab Ámirlikteriniń «Presight AI» halyqaralyq kompanııasy tańdaldy. Elordada Qazaqstandaǵy alǵashqy Sıtýatsııalyq ortalyq paıda bolady. Bul ortalyq kameralardan, datchıkterden, kólik júıelerinen jáne kommýnaldyq qyzmetterden alynǵan derekterdi biriktirip, oqys oqıǵalardy avtomatty túrde tirkep, jedel qyzmetterdiń oqıǵa ornyna tez jetýin qamtamasyz etedi, - delingen Astana qalasy Kólik jáne jol-kólik ınfraqurylymyn damytý basqarmasynyń málimetinde.

Jyl sońyna deıin qalada 20 myńnan astam jańa kamera ornatylady, olardyń ishinde mektepterde, áleýmettik nysandarda jáne turǵyn aýdandarda da paıda bolady. Júıe jol qozǵalysy erejeleriniń buzylýyn, jol-kólik oqıǵalaryn jáne basqa da jaǵdaıdy anyqtap, polıtsııa men jedel járdemge, sondaı-aq kommýnaldyq qyzmetterge jedel áreket etýge kómektesedi.

- Atap aıtqanda, barlyq derek pen baqylaý Qazaqstannyń memlekettik organdarynyń quzyrynda qalady. Presight kompanııasy jobanyń tehnologııalyq negizin qamtamasyz etip, júıelerdi ıntegratsııalaýmen aınalysady. Nátıjesinde, Astana Ortalyq Azııada jasandy ıntellekt sheshimderin tolyqqandy engizýge arnalǵan ekojúıe qurylyp jatqan alǵashqy qala bolady, - dep atalyp ótken ákimdik aqparatynda.

Eske salsaq, jyl basynda Astanadaǵy beınebaqylaý júıesinen «Sergek» ketip jatqany, onyń ornyna jańa júıeni BAÁ kompanııasy engizetini málim boldy. 

Jańa joba beıne túsirilim aǵynyn taratýdyń biryńǵaı júıesin qamtamasyz etedi.