«Sergektiń» aıyppulyn joıyp beremin dep jelide jarnama bergen adam ustaldy
ALMATY. QazAqparat - Áleýmettik jelide «Sergektiń» aıyppuldaryn joıyp beremin degen jarnama paıda boldy, dep habarlaıdy QazAqparat tilshisi.
Áleýmettik jelide «Sergek» avtomattandyrylǵan júıesi tirkelgen jol erejesin buzý faktileri boıynsha taǵaıyndalǵan aıyppuldardy joıý jóninde habarlama tarady.
Almaty qalalyq Polıtsııa departamenti bul faktini tekserdi.
«Nátıjesinde Almaty qalasynyń jas turǵyny anyqtalyp, tergeýge alyndy, ol belgili bolǵanyndaı, aıyppuldardy zańdy túrde joıý boıynsha zańgerlik qyzmet kórsetýmen aınalysatyn bolyp shyqty. Er adam túsindirgendeı, mundaı «túsiniksiz» jarnamalardy ornalastyrý arqyly klıentterdi qyzyqtyryp, tartqysy kelgen», - dedi Almaty Polıtsııa departamenti bastyǵynyń orynbasary Rýstam Ábdirahmanov.
Onyń aıtýynsha, avtomattandyrylǵan júıe jumysyna adamı faktor yqpal ete almaıdy.