«Sergekpen» birge endi ZEREK-2 qala syrtyndaǵy joldarda jyldamdyqty baqylaıdy
ASTANA. QazAqparat - Jol júrisi qaýipsizdigin qamtamasyz etý jáne jol-kólik oqıǵalarynyń aldyn alý boıynsha baqylaýdy kúsheıtý maqsatynda ІІM Avtomobıl joldary komıteti men «QazAvtoJol» UK» AQ birlesip, jyldamdyq rejımin asyrǵan avtokólikterdi tirkeý úshin qala syrtyndaǵy joldarda kameralardy paıdalaný jónindegi júıeni iske qosady, dep habarlaıdy QazAqparat Polisia.kz-ke silteme jasap.
«33 «ZEREK-2» baǵdarlamalyq-apparattyq kesheni ákimshilik óndiristerdiń biryńǵaı tizilimi júıesimen ıntegratsııalanǵan, ıaǵnı nusqamalardy quqyqbuzýshylarǵa jiberý avtomatty rejımde júzege asyrylatyn bolady. Búgingi tańda «ZEREK-2» Shymkent – Qyzylorda, Shymkent – Ózbekstan shekarasy, Shymkent – Taraz, Taraz – Qaınar, Qonaev – Taldyqorǵan jáne Astana – Pavlodar avtojoldarynda jumys atqarýǵa daıyn. Osyndaı baǵdarlamalyq keshen Kókshetaý – Astana tasjolynda buryn iske qosylǵan bolatyn jáne joldaǵy quqyq buzýshylyqtardy tirkeýde jaqsy nátıjeler kórsetip jatyr», – dedi ІІM ákimshilik polıtsııa komıtetiniń erekshe tapsyrmalar jónindegi aǵa ınspektory Aqtoty Boranova. Jeti aıda elimizdiń joldarynda jeti myńǵa jýyq jol-kólik oqıǵasy tirkeldi, onda 1 200-den astam adam qaza taýyp, 8 500-ge jýyq adam túrli dárejedegi jaraqat aldy.
Onyń ishinde jyldamdyq rejımin saqtamaý saldarynan qala syrtyndaǵy trassalarda 730 jol-kólik oqıǵasy tirkeldi, onda 300-den astam adam qaza taýyp, 1200-den astam adam zardap shekti.
«Joǵaryda atalǵan joldarda 25 tamyz saǵat 00:00-den bastap «ZEREK-2» kesheni shtattyq rejımde jumys atqaratyn bolady. Osy múmkindikti paıdalana otyryp, barlyq júrgizýshilerden jyldamdyq rejımin jáne avtokólikter arasyndaǵy qashyqtyqty saqtaýdy suraımyz. Sizdiń ómirińizden mańyzdy eshteńe joq!» – dedi Aqtoty Boranova.
