«Sergek» júıesi qansha aıyppul salý deregin tirkedi

ASTANA. KAZINFORM — «Sergek» ıntellektýaldy qoǵamdyq jáne jol qaýipsizdik júıesi keıingi bir jylda Qazaqstanda 10 mıllıonnan astam ákimshilik ereje buzý deregin tirkedi.

Іshki ister mınıstrliginiń resmı saýalǵa bergen jaýabynda kameralar jol erejesin buzýdyń eń kóp taralǵan túrlerin avtomatty tártipte anyqtaıtynyn atap ótken. 
Vedomstvo aqparatyna qaraǵanda, joldaǵy qaýipsizdikti jáne júrgizýshi tártibin jaqsartý úshin el boıynsha shamamen 27 800 kamera ornatylǵan.

- Esepti kezeńde osy júıelerden alynǵan derekterdi paıdalana otyryp, ákimshilik aıyppuldardy tóleý týraly 10 mıllıonnan astam nusqama shyǵaryldy», - delingen mınıstrlik aqparatynda. 

Intellektýaldy júıeler ınspektorlardyń tikeleı qatysýynsyz ereje buzý deregin avtomatty túrde anyqtaýǵa múmkindik beredi.

Júrgizýshiler aıyppuldarǵa qanshalyqty jıi shaǵymdanady?

Іshki ister mınıstrliginiń habarlaýynsha, ákimshilik quqyq buzý derekterin qaraıtyn organdardyń áreketteri men sheshimderine shaǵymdaný belgilengen tártippen, ıaǵnı Ákimshilik quqyq buzýshylyq týraly kodeksiniń 44 jáne 44-1 taraýlaryna sáıkes júrgiziledi.

Barlyq shaǵym qoldanystaǵy protsedýralyq normalar aıasynda jeke qarastyrylady.

Vedomstvo avtomatty júıede jekelegen tehnıkalyq aqaýlar bolýy múmkin ekenin moıyndady. Bul turǵyda keıde kólik nómirlerin durys taný múmkin bolmaı jatady. 

- Mundaı jaǵdaılar tehnıkalyq sıpatta jáne kóp kezdespeıdi. Osyndaı materıaldar boıynsha aıyppuldar joıylady, - dep naqtylady Іshki ister mınıstrligi.

Eske salsaq, 2025 jyly jazda Astanada Sergek drondary synaqtan ótip jatqany málim boldy.

Byltar qazan aıynda «Sergek» beınebaqylaý júıesin arab kompanııasyna berý týraly máselege elorda ákimi Jeńis Qasymbek Nura aýdanynyń turǵyndarymen kezdesýde túsinikteme berdi.