«Sergek» kesheni avtokólik markasyn anyqtaı alady

ALMATY. QazAqparat - Avtokólik markasyn anyqtaıtyn «Sergek» kesheni kólik urlyǵymen kúresýge kómektesedi. Bul týraly Almatynyń Kazakhstan urban forum dıalog alańynda aıtyldy, dep habarlaıdy QazAqparat tilshisi. 

«Jańa jyldan keıin avtokólik markasyn anyqtaýdy iske qosamyz. Máselen, qazir kólik urlansa, onyń nómirin qoldan engizý arqyly izdeıdi. Sol úshin qaskúnemder birden kólik nómirin aýystyryp tastaıdy da, ony tabý qıynǵa soǵady. Biz bul fýnktsııany qosqannan keıin baǵdarlama kesheni avtomatty túrde avtokólik sıpatyna saı nómirlerdi tizip beredi. Sonda qoldy bolǵan múlikti tabý polıtseılerge de ońaıǵa túspek»,-dedi «Sergek» júıesin jasaýshy kompanııanyń ókili Stanıslav ıAshenkov Kazakhstan urban forum kezinde. 

Onyń aıtýynsha, Astanada 400 «Sergek» kompleksi ornatylǵan. Almatyda mundaı keshender pılottyq joba aıasynda júzege aspaq. Sondaı-aq Shymkent, Óskemen qalalarynda engizý de josparda bar.