«Sergek» kameralarynyń arqasynda elordada jol-kólik oqıǵasy 40 paıyzǵa azaıdy
NUR-SULTAN. QazAqparat – «Sergek» kameralarynyń arqasynda Nur-Sultanda jol-kólik oqıǵalary men qoǵamdyq oryndarda tirkeletin qylmystardyń sany edáýir azaıdy, dep habarlaıdy QazAqparat tilshisi.
«Ózderińiz biletindeı, 2017 jyly elordada «Sergek» baǵdarlamasyn iske qosqan bolatynbyz. Osy jyldyń 10 aıyndaǵy kórsetkish pen ótken jyldyń 10 aıynyń kórsetkishin salystyrǵanda elordada jol-kólik oqıǵalarynyń sany 40 paıyzǵa azaıdy. Jol apaty saldarynan jaraqattaný deńgeıi 50 paıyzǵa tómendedi», - dedi Nur-Sultan qalasynyń tsıfrlandyrý jáne memlekettik qyzmet basqarmasynyń bólim basshysy Danıal Áıtkenov onlaın brıfıng barysynda.
Onyń aıtýynsha, jol-kólik oqıǵalarymen birge «Sergek» kameralarynyń arqasynda qoǵamdyq oryndarda tirkeletin qylmystardyń sany 44 paıyzǵa kemigen.
Eske sala ketsek, buǵan deıin sybaılas jemqorlyqqa qarsy kúres máseleleri jónindegi keńeste sóz sóılegen QR Prezıdenti Qasym-Jomart Toqaev «Sergek» suǵanaq jol polıtseılerin jemqorlyq tabystarynan qaqqanyn málim etken edi.
