«Sergek» kameralary qulaǵy nashar estıtin 2 jasar qyzǵa kómektesti
ASTANA. QazAqparat - Búgingi tańda Astanada 10 myńǵa jýyq kamera ornatylyp, jumys isteýde, dep habarlaıdy elorda ákimdiginiń resmı saıty.
Ásel Júsipovanyń januıasy úshin ádettegi serýen keleńsiz jaǵdaıǵa soqtyra jazdady.
Onyń aıtýynsha, sol kúni balalarymen ádettegideı serýenge shyqqan.
«Qyzymyzdyń qulaǵy týǵannan-aq nashar estıtin. Sol sebepti oǵan kvota boıynsha ota jasalǵan-dy. Ota jasalǵanmen, ol estý úshin únemi belgili bir protsessorlardy kıip júrýge májbúr. Keshe serýendep júrgende qyzym bas kıimin sheshkende, sol protsessorlar qulap qalǵan bolýy kerek. Olardyń joǵalǵanyn men tek «Qazaqstan» kontsert zalyna jetkende ǵana kórdim. Budan keıin birden artqa oralyp, qurylǵylarymyzdy izdeı bastadyq, ótip bara jatqan azamattardan suradyq. Alaıda, olardy eshkim kórmepti.
«Sankt-Peterbýrg» bıznes ortalyǵyna qarama-qarsy ornalasqan turaqtyń mańynda qyzymyzdyń bas kıimin tapsaq ta, apparat onyń ishinde bolǵan joq. Keıin jubaıym ekeýmiz birden polıtsııanyń kómegine júgindik. Biz kameralar arqyly apparatty tabamyz dep sendik. Osynyń nátıjesinde ol birneshe saǵat óter-ótpeste tabyldy», - dep baıandady Á. Júsipova.
Bóbektiń anasy osy oqıǵaǵa nemquraılyq tanytpaǵan azamattarǵa, polıtsııa jáne «Astana Innovations» qyzmetkerlerine aıtar alǵysy sheksiz.
Aıta keteıik, búgingi tańda qalada 10 myńǵa jýyq kamera ornatylyp, jumys isteýde. Barlyq 13 myń jol kamerasy Astanada 1 maýsymǵa deıin iske qosylady dep josparlanǵan.
