«Sergek» kameralary iske qosylǵannan keıin jol erejesin buzý azaıdy

ASTANA. QazAqparat - «Sergek» kameralar jol-kólikoqıǵalarynyń sanyn azaıtýǵa aıtarlyqtaı septigin tıgizip jatyr. Bul týraly Astana qalasynyń ákimdiginde «Tsıfrlyq Astana: qazirgi jaǵdaıy men keleshegi» taqyrybynda ótken baspasóz máslıhaty barysynda  qalalyq Investıtsııalar jáne damý basqarmasynyń basshysy Álisher Ábdihalyqov málim etti, dep habarlaıdy «QazAqparat» HAA tilshisi.

Baspasóz máslıhatynda tsıfrlyq máseleler jóninde bolyp ótken respýblıkalyq jıynnyń strategııalyq mindetterine baılanysty ákimdik SmartAstana tujyrymdamasymen tanystyrdy. Bekitilgen Smart Astana tujyrymdamasy aqyldy qalalardyń eýropalyq úlgisi negizinde ázirlengen. Sonymen birge, onyń maqsaty - Astananyń ınfraqurylymy men basqarý ádisterin jetildirý arqyly «aqyldy qalaǵa» aınaldyrýǵa baǵyttalǵan. Osylaısha, ákimdik aqyldy ekonomıka, aqyldy qoǵam, aqyldy basqarý, aqyldy ómir súrý salty, aqyldy kólik, aqyldy qorshaǵan orta baǵyttary boıynsha jumys júrgizip jatyr.

Astana qalasynyń Investıtsııalar jáne damý basqarmasynyń basshysy Álisher Ábidhalyqov óz sózinde elordada «Sergek» ıntellektýaldyq beıne baqylaý júıesi» jobasy iske asyrylǵanyn habarlady. Onyń aıtýynsha, jańa júıe jyldamdyqty asyrý, Bus Lane avtobýs jolaǵymen júrý jáne Stop syzyqtaryn kesip ótý sekildi ereje buzýdyń 3 túrin tirkeıdi.

«Bul - memleketttik-jekeshelik seriktestik aıasynda IT-qaýipsizdik salasynda qol qoıylǵan tuńǵysh kelisim. Jergilikti atqarý organdardaǵy eń aýqymdy joba dese de bolady. Jeke ınvestıtsııanyń mólsheri 8,4 mlrd teńge. Qazirgi ýaqytta júıe 99 paıyz kórsetkishpen kólikterdiń nómirin tanyp, tirkeı alady. Tipti aldaǵy ýaqytta kólikterdiń túsin de ajyratatyn bolady. Jınaqtalǵan beınemálimet bazada 1 aı boıy saqtalady. Al jol boıyndaǵy ereje buzýǵa qatysty derekter joıylmaıdy», - deıdi ol.

Álisher Ábdihalyqovtyń aıtýynsha, synaq keziniń ózinde 500 mln-ǵa jýyq beınemálimet jınaqtalyp qalǵan.

«Eń aldymen bul joba arqyly qaladaǵy qaýipsizdikti kúsheıtýdi maqsat tutyp otyrmyz. Qala budan aqsha tabýdy oılap otyrǵan joq. Kamera barlyq kóshelermen birge, halyq kóp jınalatyn oryndarǵa qoıylady. Mobıldik qyzmet beıne málimet boıynsha birden áreket etýge ázir turady. Jol-kólik oqıǵasy saldarynan qazirgi tańda Qazaqstan JІÓ-niń 1,5 paıyzyn joǵaltyp otyr. Oǵan adamdardyń jol apaty saldarynan zardap shegip jatqanyn, jol qurylǵylaryn qaıta qalpyna keltirý shyǵyndaryn qosa berińiz. Alǵashqy nátıjelerdide kórip otyrmyz. Adamdar jol erejelerin buzýdy azaıta tústi», - deıdi ákimdik ókili.