«Sergek» kameralary: Atyraýda eki aptada 190,7 mln teńgege aıyppul salyndy

ATYRAÝ. QazAqparat – Atyraý qalasynda eki aptada «Sergek» kameralary arqyly jol erejesin buzýdyń 23,4 myń faktisi anyqtalyp, 191 mln teńgege jýyq aıyppul salyndy. ​Bul týraly oblystyq máslıhattyń kezekti sessııasynda oblystyq Jolaýshylar kóligi jáne avtomobıl joldary basqarmasynyń basshysy Áset Orazǵalıev máli etti, dep habarlaıdy QazAqparat.

«Bıylǵy 10 qyrkúıek - 25 qarasha aralyǵynda «Sergek» kameralary arqyly jol júrý erejesin buzýdyń 23​ 483 deregi tirkelgen. Quqyq buzýshylarǵa 190 mln 751 myń teńge aıyppul salyndy. Atalǵan qurylǵynyń iske qosylýymen jol kólik oqıǵalary 27 paıyzǵa tómendedi. Sondaı-aq, bul qurylǵylardyń kómegimen ashylǵan qylmys 65 paıyzǵa artyp, ákimshilik quqyq buzýshylyqty anyqtaý 17 esege ósti. Al, jol-kólik oqıǵasynyń saldarynan bolatyn ólim-jitimdi 45 paıyzǵa tómendetýge kómegi bar ekenin kúndelikti tájirıbe kórsetip otyr», - dedi Áset Orazǵalıev.

Onyń aıtýynsha, qazir Atyraý qalasynda jol qozǵalysyn baqylaý men quqyq buzýshylyqtardy anyqtaý maqsatynda 51 kóshe qıylysyna, 153 túzý jolǵa 1224 sýretke túsirý jáne vıdeo jazý, qoǵamdyq qaýipsizdikti baqylaıtyn 774 vıdeobaqylaý kamerasy ornatylǵan.

Eske salaıyq, budan buryn Atyraýda baqylaý kamerasynyń kómegimen 186 qylmys ashylǵanyn jazǵan bolatynbyz.