«Sergek» kameralary Almatydaǵy jol apatynyń azaıýyna yqpal etti
ALMATY. QazAqparat – Almatyda jyl sońyna deıin 380 «Sergek» beınebaqylaý kameralaryn ornatý josparlanyp otyr, dep habarlaıdy QazAqparat tilshisi.
Polıtsııanyń málimetinshe, 4 aıdyń qorytyndysy boıynsha jol-kólik oqıǵalary 28,4% – ǵa azaıǵan. Jalpy 765 kólik apaty tirkeldi, sonyń saldarynan 23 adam qaza taýyp, 884 adam túrli dene jaraqatyn aldy.
«Apattar sanynyń azaıýy «Sergek « APK beınebaqylaý kameralaryn ornatýmen baılanysty. Qazirgi ýaqytta Almatyda 404 «Sergek» kamerasy jumys isteıdi. 2020 jyldyń aıaǵyna deıin qosymsha 380 kamerany (210 jol qıylysy, 170 syzyqty aımaqtarda) ornatý josparlanýda. 2020 jyldyń 4 aıynda «Sergek» APK kameralarynyń kómegimen 60 myńnan astam jol qozǵalysy erejeleriniń buzylýy anyqtaldy. 436 mıllıon teńgeden astam somada aıyppul salyndy. Sondaı-aq, qalada 105 postan turatyn «BDD» AAJ quryldy. Kameralar ornatylǵan jerlerde jyl saıyn jol qozǵalysy erejeleriniń buzylýy 20% -ǵa tómendeýde», - dedi Almaty qalalyq polıtsııa departamentiniń bastyǵy Qanat Taımerdenov.
Jalpy jyl basynan beri qala joldarynda 214 506 jol erejelerin buzý faktileri anyqtalyp, 1,2 mıllıard teńgege aıyppul salyndy.
«Ákimshilik jaýapkershilikke 76 648 ereje buzýshy tartyldy, onyń ishinde 74 479 júrgizýshi, al 276 júrgizýshi mas kúıinde kólik júrgizgeni úshin ustalǵan. Sot 379 júrgizýshini kólik quralyn basqarý quqyǵynan aıyrdy. 235 júrgizýshi ákimshilik qamaýǵa alyndy», - dedi Qanat Taımerdenov.
