«Sergek» iske qosylǵaly 250 mln teńgeden astam aıyppul salynǵan
ASTANA. QazAqparat - Elordada «Sergek» kameralary iske qosylǵaly beri ótken jyly quqyq buzýshylarǵa 242 mln, 2018 jyldyń basynan beri 9 mln teńgeniń aıyppuly salynǵan. Bul týraly búgin Astanada ótken baspasóz máslıhatynda Astana qalasy ІІD Jergilikti polıtsııa qyzmetiniń bastyǵy polıtsııa polkovnıgi Baqytjan Malybaev málim etti, dep habarlaıdy «QazAqparat» HAA tilshisi.
«Memlekettik-jekeshelik seriktestik aıasynda elordada 2017 jyldyń qazanynan bastap 20 jelilik jol ýchaskesinde «Bus Line» boıynsha buzýshylyqtardy jazyp alatyn «Sergek» apparattyq-baǵdarlamalyq kesheni iske qosyldy. Keshen jol qozǵalysyn táýlik boıy avtomatty túrde baqylaý múmkindigin usynady. Sonymen birge, kólik quraldarynyń jol-júrý erejelerin buzýyn qashyqtan jazyp alýǵa arnalǵan. «Sergek» apparattyq-baǵdarlamalyq keshenin engizý qalada jol-kólik oqıǵalary sanynyń qysqarýyna aıtarlyqtaı yqpal etti», - deıdi Baqytjan Malybaev.
Onyń aıtýynsha, Astanada 2017 jyldyń qorytyndysy boıynsha jol-kólik oqıǵalary 1,7 paıyzǵa tómendegen.
«Sergek» ABK iske qosylǵannan bastap 2017 jyldyń aıaǵyna deıin 242 mıllıon teńgeden astam aıyppuldy quraǵan 35 myńnan astam quqyqbuzýshylyq tirkeldi. Jyl basynan beri aıyppuldyń jalpy mólsheri 9 mıllıon teńgeden astam 1 580 quqyq buzýshylyq tirkeldi», - deıdi Malybaev.
