«Sergek» elordadan ketip jatyr: qaladaǵy kameralardy BAÁ kompanııasy basqarady
ASTANA. KAZINFORM – Astanadaǵy beınebaqylaý júıesinen «Sergek» ketip jatyr. Onyń ornyna jańa júıeni BAÁ kompanııasy engizedi. Bul týraly elorda máslıhatynyń kezekten tys sessııasynda Astana qalasy Tsıfrlandyrý jáne memlekettik qyzmet basqarmasynyń basshysy Dıdar Súleımenov málim etti.
- 2017 jyly «Sergek» jobasy júzege asyryldy. Bıyldyń 13 naýryzynda «Kórkem Telekom» kompanııasymen kelisimshart merzimi aıaqtalady. Memleket basshysynyń tapsyrmasy aıasynda jáne jobany odan ári damytý turǵysynda G42 holdıngine kiretin Presight halyqaralyq kompanııasymen elorda úshin jasandy ıntellekt negizinde qalalyq ınfraqurylymdy basqarýdyń jobalyq sheshimin iske asyrý jumysyn atqardyq. Jańa jobany qalyptastyrý kezinde qazirgi qoldanystaǵy júıeniń kemshilikteri eskerildi, - dedi Dıdar Súleımenov.
Onyń aıtýynsha, jańa jobada apparattyq-baǵdarlamalyq keshenniń basym bóligi úzdiksiz jumys isteýin qamtamasyz etý úshin turaqty elektr energııasyn qosý qarastyrylǵan. Sondaı-aq beıne túsirilimniń úzdiksiz berilýin qamtamasyz etý baǵytynda beınebaqylaý kameralary optıkalyq baılanys jelisine qosylady.
- Jańa joba beıne túsirilim aǵynyn taratýdyń biryńǵaı júıesin qamtamasyz etedi. Qazirgi ınfraqurylym jańa jeke seriktestiń basqarýyna beriledi, bul qazirgi júıeniń úzdiksiz jumys isteýin qamtamasyz etedi. Jobada 22 myń jalpy beınebaqylaý kamerasy, qıylystarda 732 apparattyq-baǵdarlamalyq keshen, jelilik ýchaskelerde 470 apparattyq-baǵdarlamalyq keshen, sonymen qatar beıne taldaýdyń 35 túri qarastyrylǵan. Joba aıasynda derekterdi óńdeý ortalyǵy uıymdastyrylyp, kez kelgen oqys oqıǵaǵa jedel áreket etý úshin jedel kommýnaldyq qyzmetterdi biriktiretin biryńǵaı sıtýatsııalyq ortalyq qamtamasyz etiledi, - dedi basqarma basshysy.
Onyń sózine qaraǵanda, joba 2030 jylǵa deıin josparlanǵan. Biryńǵaı sıtýatsııalyq ortalyq qurýdyń arqasynda adamdar kóp jınalatyn oryndardy 100% beınebaqylaýmen qamtamasyz etý arqyly qaýip-qaterlerge jyldam áreket etý múmkindigi bolady. Al jasandy ıntellektini qoldaný jol qozǵalysyn baqylaýdy ońtaılandyrýǵa jáne jol qaýipsizdigin arttyrýǵa, qalalyq qyzmetterdiń jumysyn jaqsartýǵa yqpal etedi.
- Jeke seriktestiń ınvestıtsııasy 53 mlrd teńge. Joba tolyǵymen jeke seriktestiń óz qarajaty esebinen qarjylandyrylady. Bul rette qazaqstandyq kompanııalardyń qatysýy jumys kóleminiń 60 paıyzyn qamtıdy, - dedi Dıdar Súleımenov.
Buǵan deıin Pavlodarda «Sergek» kameralaryn ornatý múmkindigi týraly jazǵan edik.