«Sergek» bıýdjetke 1 mlrd teńge ákelgen
ASTANA. QazAqparat - «Sergek» beınetirkeý jáne beınebaqylaý júıeleri kómegimen memlekettik bıýdjetke jalpy somasy 1 mlrd 270 mln teńge kóleminde qarjy túsken. Bul joba jol-kólik oqıǵalarynyń sany 16%-ǵa, JKO-nan jaralaný 22%-ǵa, jol-kólik oqıǵasy saldarynanbolatyn ólimdi 54%-ǵa tómendetýge múmkindik berdi, dep habarlaıdy Astana ákimdiginiń resmı saıty.
Esterińizge sala keteıik, «Astana qalasynda foto - beınetirkeý jáne beınebaqylaý apparattyq-baǵdarlamalyq keshendi qurý jáne paıdalaný» jobasy 2017 jyly Astana qalasynyń ınvestıtsııalar jáne damý basqarmasy men «Astana Innovations» AQ jáne «Kórkem Telekom» JShS-niń arasynda memlekettik-jekemenshik áriptestik jobasyn iske asyrý týraly kelisimshart aıasynda júzege asqan.
Joba MJÁ aıasynda júzege asqan jáne elimiz boıynsha aqparattyq tehnologııa men qaýipsizdik baǵytynda jasalǵan alǵashqy kelisimshart. «Sergek» Nazarbaev Ýnıversıtetiniń ǵalymdaryn tarta otyryp jasalǵan tolyǵymen ózimizdiń júıe, onyń negizine mashınalyq oqytý jelileriniń neırondy tehnologııasy qoldanǵan.
MJÁ jobasyn iske asyrýdyń nátıjesi qozǵalys aǵynynyń monıtorıng sapasyn arttyrý, sondaı-aq ákimshilik aıyppuldar esebinen jergilikti bıýdjetti tolyqtyrý.
Joba aıasynda 13 myń kamera qoıý jáne ıntegratsııalaý kózdelgen, onyń ishinde 6 myń kamera qala kóshelerine (400 qıylys pen 300 jelilik ýchaske) 4 myń kamera adamdar kóp jınalatyn oryndarǵa, saýda oıyn-saýyq jáne bıznes ortalyqtarynda ornatylǵan 3 myń syrtqy kamerany ıntegratsııalaý belgilengen.
