«Sergek» budan bylaı baǵdarshamnyń qyzyl túsine ótken jaıaý adamdy da túsirip alady

NUR-SULTAN. QazAqparat - Nur-Sultandaǵy «Sergek» kameralarynyń jumysyna qosymsha fýnktsııa engizildi, dep habarlaıdy QazAqparat.

Búgingi tańda Nur-Sultan qalasynyń 26 retteletin jaıaý júrginshiler ótkelinde «baǵdarshamnyń tyıym salatyn sıgnalyna ótý» buzýshylyqtaryn anyqtaý boıynsha «Sergek» apparattyq baǵdarlamalyq kesheniniń qosymsha fýnktsııasy ázirlenip, engizildi.

Bul jańalyq «Balalardyń joldaǵy qaýipsizdigi» jedel-aldyn alý is-sharasyn júrgizý sheńberinde iske qosylǵan.

Polıtsııa 2021 jyly qalanyń jaıaý júrginshiler ótkelinde 98 jol-kólik oqıǵasy oryn alǵanyn atap ótti.

Jaıaý júrginshilerdi retteletin ótkelde 38 márte jáne rettelmeıtin ótkelde 60 márte kólik qaǵyp ketken.

Saldarynan 100-ge jýyq adam túrli dárejede dene jaraqatyn aldy.

Polıtsııa departamenti jol qozǵalysynyń barlyq qatysýshylaryna bir-birine ózara qurmet kórsetýdi, al júrgizýshilerge abaı bolýdy jáne jaıaý júrginshini kórgende jyldamdyqty tómendetýdi usynady.