«Sergek»: Astanalyqtarǵa bir aptada 56,6 mln teńgege aıyppul salyndy

Elorda ákimdiginen málim etkendeı, keńes barysynda qalanyń tynys-tirshiligine qatysty máseleler talqylandy.

Úlestik qurylysqa qatysýshylardyń máseleleri boıynsha qala ákiminiń birinshi orynbasary Sergeı Horoshýn aıtyp berdi.

«Ótken aptada biz «Azbýka jılıa» nysandaryna qatysty jaǵdaı boıynsha tolyq málimet bergen bolatynbyz. Aldaǵy eki aptada biz «Aısanam de lıýks» jáne «Sadovye kvartaly» turǵyn úı keshenderi boıynsha saraptama qorytyndysyn alamyz dep josparlap otyrmyz. Sonymen qatar, osy nysandarǵa qatysty qarjylyq modeldi bekitý jáne konkýrsty jarııalaý materıaldary daıyndalýda. Problemaly «Komsomolskıı» nysanyna qatysty saraptamanyń qorytyndysyn alý aqpan aıynyń ortasyna josparlanǵan. Aldaǵy aptada «ISK ASI Kotlıarova S. V» kompanııasynyń nysandaryna qatysty jumystar júrgiziletin bolady. Basqa nysandar boıynsha jumystar josparǵa saı júrgizilip jatyr», - dedi S. Horoshýn.

Densaýlyq saqtaý salasyndaǵy, sondaı-aq elordada uıymdastyrylǵan muz qalashyqtary men muz aıdyndaryndaǵy qazirgi jaǵdaı týraly elorda ákiminiń orynbasary Ermek Amanshaev baıandap berdi.

«Medıtsınalyq uıymdar Biryńǵaı dıstrıbıýtormen 2019 jylǵa dárilik zattardy jetkizýge oferta sharttar jasady, preparattardy jetkizý bastalyp ketti. Jyl basynda patsıentter dárilik zattarsyz qalmaýy úshin 2018 jyldyń jeltoqsanynda barlyq patsıentterge 3 aıǵa jetetin preparattar berildi», - dedi E. Amanshaev.

Onyń aıtýyna qaraǵanda, 26 qańtardaǵy jaǵdaıǵa sáıkes densaýlyq saqtaý máseleleri boıynsha rezonanstyq jaǵdaılar bolǵan joq. Esepti aptada IKomek «Qalalyq monıtorıng jáne jedel áreket etý ortalyǵyna» 101 shaǵym túsken.

«Barlyq túsken shaǵymdar qaralýda, olardyń árqaısysy boıynsha sharalar qabyldanady. Kelip túsken shaǵymdardyń basym bóligi birden sheshiledi», - dedi Amanshaev.

Qala bıýdjetiniń oryndalýy barysy, qabyldanǵan obektilerdi qalanyń kommýnaldyq menshigine alý, sondaı-aq memlekettik satyp alý josparynyń oryndalýy týraly qala ákiminiń orynbasary Asqar Ámrın málim etti.

Qala ákiminiń orynbasary Malıka Bekturovanyń sózinshe, Astanada azyq-túliktiń negizgi túrleriniń baǵasy turaqty.

Qaladaǵy krımınogendi jaǵdaı jáne quqyqtyq tártipti qamtamasyz etý boıynsha qolǵa alynǵan sharalar boıynsha esepti polıtsııa departamentiniń bastyǵy Marat Qojaev berdi. Onyń málimetinshe, qaladaǵy jaǵdaı turaqty. Ótken aptada 479 qylmys tirkelgen,. Bul aldyńǵy aptamen salystyrǵanda 41 qylmysqa az. Aýyr dene jaraqat alý men avtokólikti urlaý oqıǵalary tirkelgen joq, buzaqylyq kórsetý oqıǵalarynyń ósimine jol berilmeı, tonaý sany azaıyp otyr.

«Sergek» kesheni arqyly bir apta ishinde 8 628 (56,6 mln. teńgege ) quqyqbuzýshylyq tirkelip, óńdeldi. Vıdeobaqylaý kameralarynyń kómegimen 12 qylmys, 805 ákimshilik quqyqbuzýshylyq anyqtalyp, 62 qylmys «izi sýymaı» ashyldy. Tústi metaldar qabyldanatyn oryndardy tekserý jumystary jalǵasýda. 51 pýnkt tekserilip, (Baıqońyr-17, Sary arqa-18, Esil-16), metall jınaýmen jáne metall qabyldaýmen aınalysatyn 25 tulǵa ákimshilik jaýapqa tartyldy. Lıýkterdi urlaý oqıǵalary tirkelgen joq.

Qalany aldaǵy gazdandyrý barysy týraly Otyn-energetıkalyq kesheni jáne kommýnaldyq sharýashylyq basqarmasy basshysy E. Tóleýov baıandady. І kezektiń júzege asyrylý merzimi 2019 jyldan 2023 jylǵa deıingi aralyqta qarjylandyrý bólinýiniń shamasyna baılanysty josparlanyp otyr.

2025 jylǵa deıingi densaýlyq saqtaý ınfraqurylymyn damytýdyń biryńǵaı perspektıvalyq josparyn iske asyrý barysy týraly qoǵamdyq densaýlyq saqtaý basqarma basshysy Qamaljan Nadyrov aıtty. Josparda 9 aýrýhanalyq uıymdy biriktirý jolymen tórt kópbeıindi qalalyq aýrýhana jáne medıtsınalyq psıhologııalyq densaýlyq ortalyǵyn qurý qarastyrylǵan. Budan bólek, emhanalardyń 20 mınýttyq aralyqta ornalasýyn jáne jalpy qaraıtyn dárigerge túsetin júktemeni azaıtý maqsatynda emhanalar jelisin qurý tujyrymdamasy ázirilgen. Onda qymbat emhanalardyń ornyna shaǵyn dárigerlik ambýlatorııalardy ashý qarastyrylǵan. Bul joba «Qoljetimdi dáriger» ataýyna ıe boldy.

«Osyǵan baılanysty, atalǵan jobanyń áleýmettik mańyzdylyǵyn eskere otyryp, Biryńǵaı perspektıvalyq josparda kózdelip josparlanǵan 11 emhana qurylysynyń ornyna 51 dárigerlik ambýlatorııa ashý boıynsha ózgerister usynamyn», - dep atap ótti Nadyrov.

«Tsıfrlyq Qazaqstan» memlekettik baǵdarlamasyn júzege asyrý aıasynda barlyq medıtsınalyq uıymdar ınternet jelisine 100% qosylǵan. Barlyq mektepterde keń jolaqty ınternet bar. Balabaqshaǵa kezekke qoıý jáne olarǵa joldama berý, 1-synypqa qabyldaý, kolledjderge qabyldaý avtomattandyryldy.