«Sergek» arqyly tólenetin aıyppuldar qaıda ketip jatyr
ALMATY. QazAqparat – Almaty polıtsııasy «Sergek» kamerasyna tirkelgen quqyqbuzýshylyqtarǵa tólenetin aıyppul qaıda ketip jatqanyn aıtty, dep habarlaıdy QazAqparat tilshisi.
«Byltyrdan beri «Sergek» júıesin testileýden ótkizip kelemiz. Bul keshendi biz qala turǵyndarynyń suranysyna qaraı apat kóp bolatyn jerlerde ornattyq. Bul júıe eń aldymen jol apatynyń sanyn azaıtý úshin, sodan soń jol apatyna baılanysty qylmystardy ashý úshin ornatyldy», - dedi qalalyq Polıtsııa departamentiniń ákimshilik polıtsııa basqarmasynyń basshysy Jandos Muratalıev.
Onyń aıtýynsha, «Sergek» kamerasyna túsken quqyqbuzýshylyqtarǵa salynatyn aıyppuldardyń barlyǵy qala bıýdjetine túsedi.
«Birneshe kún boıy maǵan osyndaı saýaldar kelip jatyr. Sergek tirkegen qarajattyń barlyǵy qaıda ketedi degen. Barlyq ákimshilik aıyppuldar 1 teńgesine deıin memlekettik bıýdjetke túsedi», - dedi ol.
Almatyda 1 qańtarda «Sergek» júıesiniń 400 kamerasy birden iske qosylǵan bolatyn.
10 kún ishinde kameralar 2,5 myń jol erejesin buzý deregin tirkedi. Almatylyqtar 42 mln tóleıdi.
