«Sergek» arqyly almatylyqtarǵa 7 mlrd teńge aıyppul salyndy
ALMATY. QazAqparat - Almaty qalasynyń bıýdjetine «Sergek» kameralarynan 2020 jyldyń qańtarynan bastap jeti mlrd teńge tústi. Bul týraly qalalyq mobıldilik basqarmasynyń bastyǵy Ernur Abjahan qalalyq máslıhattyń kezekten tys IV sessııasynda aıtty, dep habarlaıdy QazAqparat tilshisi.
Ernur Ábjahannyń aıtýynsha, búgingi kúni qalada 2284 «Sergek» beıne-baqylaý kamerasy jumys istep tur.
«2020 jyldyń qortyndysy boıynsha, joldaǵy ólim-jitim 48%, jol-kólik oqıǵalary 29%, jaraqat alǵan adamdarmen bolǵan jol-kólik oqıǵalary 30% tómendedi. 16 aıda qala bıýdjetine 7 mıllıard teńge tústi «, - dedi spıker.
Onyń aıtýynsha, «Sergek» júıesi jol erejelerin buzýshylardy anyqtaýǵa múmkindik berdi. Mas kúıinde kólik quralyn basqarǵany úshin 25 buzýshy, jalǵan memlekettik tirkeý belgileri bar 9 buzýshy, jol erejesin turaqty buzýshylar anyqtaldy. Jalpy, 144,6 mln teńge somasyna 11 myńǵa jýyq uıǵarym shyǵaryldy.
«Sondaı-aq, ádilet jáne memlekettik kirister departamentimen birge salyq bereshegi bar jáne 1,2 mlrd teńgege alıment tóleýden jaltaratyn tulǵalar anyqtaldy. Mundaı boryshkerlerdiń 23 kóligi qaryzdy tóleýge deıin mamandandyrylǵan aıyppul turaqtaryna ornalastyryldy»,-deıdi spıker.
