Sergeevka sý qoımasynda sý erneýinen asyp tógilip jatyr
NUR-SULTAN. QazAqparat - Soltústik Qazaqstan oblysy aýmaǵyndaǵy shaǵyn ózenderde muz qursaýynyń buzylý protsesi jalǵasyp, Esil ózeninde sý deńgeıi kóterilip kele jatyr. Bul jaıynda QR ІІM Tótenshe jaǵdaılar komıtetinen málim etti, dep habarlaıdy QazAqparat tilshisi.
«Shaǵyn ózenderde muz keptelisi jáne sý deńgeıiniń kóterilýi baıqalady. Osyǵan oraı 6-7 sáýirde Aıyrtaý aýdana qarasty Gýsakovka eldi mekeni tusynda Babyqburlyq ózeninde, Ǵ.Músirepov aýdanynda, Rýzaevka eldi mekenine jaqyn mańda Aqanburlyq jáne Jembarmaq ózenderinde muzdy jarýy jumystary júrgizildi. Qazirgi ýaqytta 3 sý qoımasyn monıtorıngileý jumysy júrgizilip jatyr. Sergeevka sý qoımasy 122,64 paıyzǵa lyq tolyp, sý 127 santımetrge erneýinen asyp tógilýde. Sý qoımasy bar Petropavl sý toraby 95,76 paıyzǵa, Shaǵalaly sý qoımasy 77,5 paıyzǵa tolǵan», - dep atap ótedi komıtetten.
Vedomstvo málimetinshe, sý tasqyny qaýpi bar aýdandarda oblystyq tótenshe jaǵdaılar departamentiniń kúshi men quraldary jiberilgen. Atap aıtqanda, Ýálıhanov, Tımırıazev, Aıyrtaý jáne Ǵ.Músirepov aýdandaryna 63 maman, 19 tehnıka, 8 sý sorǵysh jáne 5 júzý quraly kómekke barǵan.
Ózenderdegi sý deńgeıine monıtorıng júrgizilip, keptelgen muzdy bólshekteý jumysy júrgizilip jatyr.
