Sergeev sý qoımasyna 1 mln tuqy balyǵynyń shabaǵy jiberildi
PETROPAVL. KAZINFORM – Soltústik Qazaqstan oblysynda sý aıdyndaryn balyqtandyrý jumystary bastaldy. Bul týraly QR Aýyl sharýashylyǵy mınıstrliginiń baspasóz qyzmeti habarlady.
Memlekettik tapsyrys aıasynda «Petropavl balyq pıtomnıgi» RMQK-ny Sergeev sý qoımasyna balyq jiberýdi júzege asyryp jatyr. 27 tamyz ben 15 qyrkúıek aralyǵynda sý aıdynyna 1 mln tuqy balyǵynyń shabaǵy jiberildi.
Jas balyqty jiberý barysyna vedomstvoaralyq komıssııa baqylaý júrgizdi. Onyń quramyna Esil oblysaralyq basseındik balyq sharýashylyǵy ınspektsııasynyń ókilderi, jergilikti atqarýshy organdardyń qyzmetkerleri, qoǵamdyq uıymdar jáne «Balyq sharýashylyǵy ǵylymı-óndiristik ortalyǵy» JShS Soltústik fılıalynyń mamandary kirdi.
Balyqtandyrýdyń maqsaty – tabıǵı sý aıdyndarynyń balyq resýrstaryn saqtaý, kóbeıtý jáne olardy turaqty paıdalaný.
Eske sala keteıik, buǵan deıin Almaty oblysynda taǵy bir sý qoımasy memleketke qaıtarylǵanyn jazǵan edik.