Serbııanyń jańa prezıdenti Qazaqstan elshisin qabyldady
ASTANA. QazAqparat - Serbııa prezıdenti Aleksandr Výchıch Belgradta Qazaqstannyń Tótenshe jáne ókiletti elshisi Nurbah Rústemovty qabyldady, dep habarlaıdy «QazAqparat» HAA.
«Kezdesý barysynda taraptar Qazaqstan men Serbııa arasyndaǵy ekijaqty yntymaqtastyqtyń bolashaǵy men qazirgi jaǵdaıyn, halyqaralyq problematıkany talqylady. El prezıdentine 2 sáýirde ótken prezıdent saılaýynda Aleksandr Výchıchtiń jeńýine oraı Qazaqstan basshysy Nursultan Nazarbaevtyń quttyqtaý haty tabys etildi. Qazaqstandyq dıplomat «Qazaqstannyń úshinshi jańǵyrýy; jahandyq básekege qabilettilik» atty prezıdenttiń joldaýynda aıtylǵan elimizdiń damý basymdyǵymen tanystyryp, atalmysh qujattyń serb tilinde jazylǵan mátinin tabys etti. Sondaı-aq, memleket basshysynyń «Bolashaqqa baǵdar: rýhanı jańǵyrý» baǵdarlamalyq maqalasynyń negizgi tezısteri men konstıtýtsııalyq reformanyń qorytyndysy týraly aqparat berdi», - delingen habarlamada.
Serbııa prezıdenti Qazaqstan basshylyǵymen ótken jyly bolǵan kezdesýdi tilge tıek etip, Qazaqstan astanasynyń damý qarqynyna qaıran qalǵanyn aıtty. Memleket basshysynyń sarabdal saıasatynyń arqasynda Qazaqstan halyqaralyq qoǵamdastyqqa ózin moıyndata bilgenin atap ótti. Serbııany Qazaqstandy mańyzdy seriktes retinde qarastyryp, uzaqmerzimdi qarym-qatynasty damytýǵa nıetti ekenin jetkizdi.
