Serbııanyń eki azamaty Qazaqstan aldyndaǵy erekshe eńbekteri úshin «Dostyq» ordenimen marapattaldy
ÓSKEMEN. KAZINFORM - Qazaqstan Prezıdentiniń Belgradqa resmı sapary aıasynda Serbııa azamattary Lazar Koıch pen Dragomır Karıchti marapattaý rásimi ótti, dep habarlaıdy Kazinform Aqordaǵa silteme jasap.
Olar Qazaqstan Respýblıkasynyń aldyndaǵy erekshe eńbekteri úshin II dárejeli «Dostyq» ordenimen marapattaldy. Osy joǵary marapatty Premer-mınıstrdiń orynbasary Serik Jumanǵarın tabystady.
Lazar Koıch – Qazaqstanda jańa júgeri sorttaryn ósirý boıynsha ǵylymı jobanyń jetekshisi. Ol eldegi júgeri selektsııasy men tuqym sharýashylyǵy baǵdarlamasynyń bas selektsıoneri. Onyń jumysynyń arqasynda Qazaqstanda 18 birlesken qazaqstandyq-serbtik júgeri gıbrıdi jasaldy. Sonyń nátıjesinde Qazaqstan osy daqyldyń tuqymyn ımporttaýdy almastyryp, tuqymdyq materıaldy syrttan alýdaǵy táýeldilikten aryldy. Lazar Koıch eńbek etetin kásiporyn jyl saıyn ishki naryqtyń 85%-yn qamtamasyz etetin birinshi júgeri tuqymyn óndiredi. Tuqym belgili bir mólsherde Qyrǵyzstan men Reseıge de eksporttalady.
Dragomır Karıch – kópsalaly holdıngtiń teń quryltaıshysy, Qazaqstan men Serbııa arasyndaǵy qarym-qatynastardy nyǵaıtýǵa, saıası dıalog pen ekijaqty yntymaqtastyqty damytýǵa zor úles qosty. Serbııanyń Halyqtyq jınalysyndaǵy Qazaqstanmen dostyq depýtattyq tobynyń tóraǵasy bola otyryp, eki el arasyndaǵy parlamenttik baılanystardyń damýyna serpin berip, Qazaqstannyń jaǵymdy ımıdjin qalyptastyrýǵa yqpal etti. Sondaı-aq Dragomır Karıch Serbııa aýmaǵynda ártúrli mádenı is-sharalardy, sonyń ishinde qazaqstandyq ártister men shyǵarmashylyq ujymdardyń kontserttik baǵdarlamalaryn uıymdastyryp keledi.
