Serbııamen organıkalyq aýyl sharýashylyǵynda eki jaqqa tıimdi nátıjelerge qol jetkize alamyz - Myrzahmetov
ASTANA. QazAqparat - Búgin Astanadaǵy Qazaqstan-Serbııa bıznes forýmynan keıin Qazaqstan Respýblıkasy Premer-Mınıstriniń orynbasary - Aýyl sharýashylyǵy mınıstri Asqar Myrzahmetovtiń bastamasymen Serbııa Respýblıkasy Aýyl sharýshalyǵy jáne qorshaǵan ortany qorǵaý mınıstri Branıslav Nedımovıchpen kezdesý bolyp ótti.
Kezdesý barysynda eki eldiń aýyl sharýashylyǵy salasyndaǵy ózara-qarym-qatynasy jáne basymdyqqa ıe baǵyttary talqylandy, dep habarlaıdyQR AShM baspasóz qyzmeti.
Taraptar ózara yntymaqtasý men birlesip jumys jasaýdyń zor áleýetke ıe ekendigin atap ótti. Atap aıtqanda, Qazaqstan úshin Serbııa Eýropaǵa ónim jóneltý naryǵymen asa tıimdi tereze bolsa, Serbııa úshin Qazaqstan Qytaı naryǵyna qol jetkizýdiń ótimdiligi joǵary korıdory bola alady.
«Buǵan deıin eki eldiń kóshbasshylary ózara yntymaqtasýdyń basymdyqqa ıe baǵyttaryn belgilegen edi. Onyń biri - aýyl sharýashylyǵy salasy. Barshaǵa málim, elimiz astyq pen un óndirisinde aldyńǵy qatarda. Mal sharýashylyǵynda, onyń ishinde, et pen sút óndirisinde de aıtarlyqtaı múmkindikterge ıe. Óz kezeginde, Serbııa organıkalyq aýyl sharýashylyǵynda zor tabystarǵa qol jetkizgen el. Bul baǵytta biz birigip, eki jaqqa da tıimdi nátıjelere qol jetkize alamyz», - dep atap ótti A.Myrzahmetov.
Serbııa júgeri men bıdaı óndiretin iri elderdiń biri. Qant qyzylshasy men kúnbaǵys tuqymy óndirisiniń qýattylyǵy sondaı, qant pen ósimdik maıyna degen ishki qajettiligin óteýge tolyqtaı jetedi. Jemis-jıdek, júzim óndirisi de jolǵa qoıylǵan.
Osy oraıda, Qazaqstan organıkalyq aýyl sharýashylyǵyn damytýda ózara tájirıbe almasyp, jańa suryptar shyǵarýda birlesken zertteýler júrgizýge, aýyl sharýashylyǵy ósimdikteriniń genetıkalyq áleýetin arttyrýǵa jáne eki eldiń agrarlyq ǵylymı-zertteý ınstıtýttary arasynda baılanys ornatýǵa múddeli.
«Elbasy tapsyrmasyna sáıkes bizdiń aldymyzda sapaly jáne salymdy ekologııalyq taza ónim ázirleý mindeti de tur. Bul turǵyda aıtýly tabystarǵa qol jetkizgen Serbııa elimen ózara tájirıbe almasyp, birlesip jumys jasaýǵa yntalymyz. Qazaqstan Respýblıkasynyń agroónerkásiptik keshenin damytýdyń 2017-2021 jyldarǵa arnalǵan memlekettik baǵdarlamasynda da osyndaı mindetterdi kózdep otyrmyz. Bizdiń taraptan kózben kórip, qolmen ustap qaıtý úshin jumysshy toby arnaıy saparmen baryp qaıtýǵa daıyn», - dedi ol.
Kezdesý barysynda Serbııa tarapy da Qazaqstan tarapynan usynylǵan árbir usynysqa zor mán beretinderin atap ótip, óz elderiniń aýmaǵyn Eýropaǵa shyǵatyn erkin naryq aımaǵy retinde usynýǵa ázir ekendikterin jetkizdi.
Budan bólek, taraptar Qazaqstanǵa egý materıaldary men tuqym jetkizý, fıtosanıtarlyq máselelerdi sheshý boıynsha pikir almasyp, eki eldiń arasyndaǵy saýda-ekonomıkalyq yntymaqtastyǵynyń zor áleýetke ıe ekendigin kezekti ret atap ótisti. ıAǵnı, qolda bar múmkindikter tolyqtaı paıdalanylýǵa tıis. Al búgingi bas qosý sol nátıjeli jumystardyń basy bolmaq.
