Serbııalyqtar Qazaqstannyń áskerı ónimder shyǵaratyn zaýyttaryn aralap kórdi
ASTANA. QazAqparat - Astana qalasynda QR Qorǵanys jáne aeroǵarysh ónerkásibi mınıstri Beıbit Atamqulov Serbııa Qorǵanys mınıstri Výlın Aleksandrmen kezdesti. Júzdesý barysynda taraptar qazaqstan-serbııalyq eki jaqty áskerı-tehnıkalyq yntymaqtastyq máselelerin talqylady, dep habarlaıdy QazAqparat.
Sondaı-aq serbııalyq áskerı delegatsııa Qazaqstanǵa sapary sheńberinde otandyq qorǵanys-ónerkásiptik kásiporyndardy aralap kórdi. Sapardyń birinshi nysany elektrondyq jáne elektrondyq optıkalyq ónimder shyǵaratyn «KAE» JShS birlesken kásiporny boldy. Zaýytta túngi kórý qurylǵylarynyń óndirisi jáne olarǵa qyzmet kórsetý, termııalyq dáldeýishter, turaqtandyrylǵan qashyqtan basqarylatyn jaýyngerlik modýlder jáne de basqalardyń óndirisi jolǵa qoıylǵan.
Odan keıin delegatsııa Ortalyq Azııadaǵy zamanaýı brondalǵan dońǵalaqty avtokólikter shyǵaratyn «Qazaqstan Paramont Injınırıng» JShS-niń zaýytynda boldy, onda kásiporynnyń mınadan qorǵaıtyn kúsheıtilgen brondy mashınalar shyǵaratyn ınnovatsııalyq tehnologııasymen tanysty. Kásiporynnyń joǵary tehnologııalyq jabdyqtary jumystyń tolyq tsıklin júzege asyrýǵa múmkindik beredi.
Qazaqstandyq vedomstvonyń baspasóz qyzmetinen málim etkendeı, qonaqtarǵa elimizdiń ózge de qorǵanys-ónerkásibi kásiporyndarynyń áskerı ónimderi tanystyryldy. 
Ulttyq ǵarysh ortalyǵynda serb tarabyna «KazEOSat» Jerdi qashyqtyqtan zondtaý ǵarysh júıesiniń jumysy, dáldigi joǵary spýtnıktik navıgatsııa júıesi kórsetildi. Salmaǵy 100 keliden 6 tonnaǵa deıingi ártúrli maqsattaǵy spýtnıkter jasaý, sondaı-aq ǵarysh apparattaryna arnalǵan jáne tájirıbelik óndirisi bar Arnaýly konstrýktorlyq-tehnologııalyq bıýro úshin jıyntyqtaýyshtar jasaý josparlanǵan ǵarysh apparattarynyń qurastyrý-synaý kesheniniń qurylysy barysymen tanysty.
Budan basqa, Serbııa delegatsııasy «Astana EXPO-2017» halyqaralyq mamandandyrylǵan kórmesine bardy.
