Serbııalyq Mambikom agrar kompanııasy Qazaqstanda muzdatylǵan ónimder shyǵaratyn zaýyt ashýǵa nıetti

ASTANA. KAZINFORM — Serbııalyq Mambikom agrar kompanııasy Qazaqstanda muzdatylǵan ónimder shyǵaratyn zaýyt ashýǵa nıetti. Bul týraly Aqordada Serbııa Prezıdenti Aleksandr Výchıchpen kelissózderden keıingi BAQ ókilderine arnalǵan birlesken málimdeme barysynda Memleket basshysy Qasym-Jomart Toqaev aıtty. 

— Qazaqstan men Serbııanyń qorǵanys ónerkásibi sektoryndaǵy yqpaldastyǵy qarqyndy damyp kele jatyr. Kelissóz barysynda jasandy ıntellektini jáne zamanaýı tsıfrlyq tehnologııany jappaı engizý strategııalyq turǵyda mańyzdy ekenin atap óttik. Osy baǵytta birlesip jumys isteýge daıyn ekenimizdi rastadyq, — dedi Memleket basshysy.

Prezıdent eki eldiń aýyl sharýashylyǵy salasynda da zor múmkindikter bar ekenin basa aıtty.

— Biz argoónerkásip keshenindegi áriptestikti jandandyrýǵa múddeli ekenimizdi bildirdik. Sonyń ishinde ósimdik, tuqym sharýashylyǵy salasyndaǵy yntymaqtastyqty nyǵaıtamyz dep kelistik. Serbııalyq Mambikom agrar kompanııasy Qazaqstanda muzdatylǵan ónimder shyǵaratyn zaýyt ashýǵa nıet tanytyp otyr. Bul qadam agrarlyq sektordaǵy yqpaldastyqty jańa deńgeıge kóteredi dep senemiz. Sondaı-aq biz mádenı-gýmanıtarlyq, bilim berý jáne týrızm salasyndaǵy qarym-qatynasty damytýǵa ýaǵdalastyq. Kelesi jyly Belgradta EKSPO kórmesi ótedi. Dostas Serbııanyń osy aýqymdy is-sharany tabysty ótkizýine tilektespiz. Qazaqstan EKSPO-2027 Belgrad kórmesine qatysyp, óz tájirıbesin bólisýge daıyn, — dedi Qasym-Jomart Toqaev.

Buǵan deıin Serbııa Prezıdenti Aleksandr Výchıch Qazaqstannyń eń joǵary nagradasy «Altyn qyran» ordenimen marapattalǵanyn jazǵan edik.