Serbııadaǵy tártipsizdikterden 70-ten astam adam jaraqat aldy

ASTANA. KAZINFORM – Serbııada 13 tamyz kúni keshki sherýler kezinde prezıdent Aleksandr Výchıchtiń jaqtastary men qarsylastary arasynda qaqtyǵys boldy, dep habarlaıdy Kazinform Reuters agenttigine silteme jasap.

Belgrad pen Novı Sad qalalarynda úkimet jaqtastary qarsylastaryna otshashýlar atyp, polıtsııa kózden jas aǵyzatyn gaz qoldanýǵa ıtermeledi. 

Serb progressıvti partııasynyń keńsesindegi tártipsizdikter kezinde 70-ten astam adam, onyń ishinde 16 polıtsııa qyzmetkeri jaralanǵan. 

Serbııadaǵy narazylyqtar 2024 jyldyń qarashasynan beri Novı-Sad qalasyndaǵy jańadan jóndelgen temirjol vokzalynda shatyr qulap, 16 adamnyń ómirin qıǵan soń jalǵasyp jatyr.  

Qaıǵyly oqıǵadan keıin qurylys mınıstri Goran Vesıch otstavkaǵa ketip, keıin stantsııany qalpyna keltirýge qatysqan taǵy 12 adammen birge ustaldy. Sherýshiler qaıǵyly oqıǵaǵa sybaılas jemqorlyqty, salǵyrttyqty jáne qurylys kezindegi qaýipsizdik erejelerin eskermegenin aıtyp, bılikten jaýap berýdi talap etti.  

Narazylyq aktsııalary kezinde Serbııa premer-mınıstri Mılosh Výchevıch otstavkaǵa ketti. 

Buǵan deıin Serbııa prezıdenti Výchıchtiń kelesi saılaýda kandıdatýrasyn usynbaıtynyn jazǵan bolatynbyz.