Serbııadaǵy saýda ortalyǵynda balalar eskalatordan qulap ketti
ASTANA. KAZINFORM — Belgradtaǵy saýda ortalyǵynda eskalatordan qulaǵan on bala jaraqat aldy. Olardyń úsheýine ota jasaldy, dep habarlaıdy RTS agenttigi.
Jaraqat alǵan on bala Serbııanyń Ýnıversıtettik klınıkalyq ortalyǵyna jetkizildi. Qazir olardyń barlyǵy medıtsınalyq tekserýden ótip jatyr.
Beıresmı aqparatqa sáıkes, zardap shekkender – muǵalimderimen birge saýda ortalyǵyna kıno kórýge kelgen bastaýysh synyp oqýshylary.
Oqıǵa kýágerleriniń aıtýynsha, balalardyń biriniń aıaq kıiminiń baýy eskalator tetigine ilinip qalǵan. Osydan keıin balalar biriniń ústine biri qulaǵan.
Oqıǵanyń mán-jaıy anyqtalyp jatyr. Prokýror oqıǵa ornyna baryp, tekserý júrgizdi.
— Oqıǵanyń mán-jaıyn anyqtaý úshin prokýror barlyq dáleldi jınaýdy tapsyrdy. Atap aıtqanda, eskalatorlardy paıdalanýǵa berýge jáne olarǵa tehnıkalyq qyzmet kórsetýge qatysty qujattar alynyp, beınebaqylaý kameralarynyń jazbalary tekseriledi. Prokýror oqıǵa ornynda kamera jazbalaryn ózi qarap shyqty. Sondaı-aq muǵalimderden, mektep dırektorynan jáne saýda ortalyǵynyń ýákiletti ókilderinen jaýap alynady, – delingen Belgrad prokýratýrasynyń málimdemesinde.
Vedomstvo tıisti esepter men jaraqattardyń sıpaty kórsetilgen medıtsınalyq qujattardy alǵan soń, budan arǵy áreketter týraly jurtshylyqqa habarlaıtynyn da aıtty.
Eske sala keteıik, buǵan deıin Aqtaýdaǵy saýda úıleriniń birinde jeti jastaǵy qyzdyń saýsaǵyn eskalator kesip ketkeni habarlanǵan bolatyn.