Serbııadaǵy qarttar úıindegi órtten 8 adam qaza tapty

ASTANA. KAZINFORM – Serbııanyń Velıkı-Borak qalasyndaǵy qarttar úıinde 20 qańtarǵa qaraǵan túni bolǵan órt saldarynan 8 adam qaza tapty, dep habarlaıdy Kazinform menshikti tilshisi. 

Zardap shekken taǵy birneshe adam Belgrad aýrýhanalaryna jetkizildi. Órtti sóndirýge kóptegen qutqarýshylar men órt sóndirý mashınalary jumyldyryldy. 

Órt saǵat 03:32-de bastalǵan. Oqıǵa ornyna jetken órt sóndirýshiler men qutqarýshylar jalpy aýmaǵy 500 sharshy metr ǵımarattyń 150 sharshy metrinde jalyn taraǵanyn anyqtady.

- Órt kezinde qaza bolǵandarǵa saraptama taǵaıyndaldy, qaıǵyly oqıǵanyń barlyq mán-jaıyn anyqtaý úshin qosymsha sharalar qabyldanyp jatyr. Úıdi onyń turǵyndarynyń biri ádeıi órtedi dep kúdiktenýge negiz bar, ol ózi jaraqat alǵan, - delingen Serbııa prokýratýrasynyń málimdemesinde.

Serbııa prezıdenti Aleksandr Výchıch Davosta júr, ol qarttar úıinde qaza tapqandardyń otbasylaryna sol jerden kóńil aıtty. 

- Baraevo mańyndaǵy qarttar úıinde qaza tapqandardyń otbasylaryna kóńil aıtamyn. Men Bas prokýratýranyń jedel áreketine qanaǵattanamyn jáne polıtsııanyń tergeýi sońyna deıin júrgiziledi dep oılaımyn, - dedi ol. 

Buǵan deıin Kalıfornııadaǵy órtke baılanysty 200 myńǵa jýyq adamǵa qaýip tónip turǵanyn jazǵan bolatynbyz.