Serbııada úkimetti qoldaıtyn sherýge 10 myńnan astam adam jınaldy
ASTANA. KAZINFORM — Serbııa prezıdenti Aleksandr Výchıchtiń 10 myńnan astam jaqtaýshysy kóshbasshynyń saıasatyn qoldaıtynyn kórsetý úshin Belgradqa jınaldy. Bul týraly ANEWZ agenttigi habarlady.
Výchıchtiń jaqtastary parlament ǵımaratynyń aldyna jınalyp, serb týlaryn jelbiretti.
— Sizder beıbitshilikti, turaqtylyqty jáne konstıtýtsııalyq tártipti qorǵaısyzdar, — dedi Výchıchtiń eń jaqyn odaqtastarynyń biri, parlament spıkeri Ana Brnabıch.
Bul shara úkimetti jaqtaǵan sherýdiń eń irisi boldy, oǵan 10 myńnan astam adam qatysty.
Polıtsııa Výchıchtiń jaqtastary men oǵan qarsy urandatyp jatqan úkimetke qarsy demonstranttar arasyndaǵy qaqtyǵystyń aldyn alý úshin aımaqty qorshaýǵa aldy.
Alańda naýryz aıynan beri úkimetti jaqtaıtyn shatyrly lager qurylǵan. Ótken aptada eki tarap qaqtyǵysqan kezde shıelenis ýshyǵa tústi.
Synshylar elde merziminen buryn saılaý ótkizýdi talap etip otyr. Olardyń qatarynda stýdentter, quqyq qorǵaý uıymdary, ǵalymdar men oppozıtsııalyq saıasatkerler bar. Olar Výchıch ákimshiligin jemqorlyq, saıası qarsylastarǵa shabýyl, baspasóz bostandyǵyn shekteý jáne uıymdasqan qylmyspen baılanysy úshin aıyptaıdy. Alaıda Výchıch pen onyń jaqtastary bul aıyptardy joqqa shyǵarady.
Tamyz aıynda Serbııa prezıdenti Výchıch kelesi saılaýda kandıdatýrasyn usynbaıtyny týraly jazǵan edik.