Serbııada tórtinshi tún qatarynan tolqýlar jalǵasyp jatyr

ASTANA. KAZINFORM – Serbııada oppozıtsııa jaqtastary tórtinshi tún qatarynan Belgrad, Novı-Sad jáne basqa da iri qalalarda polıtsııa bólimsheleri men bıleýshi partııa keńseleriniń aldyna jınaldy, dep habarlaıdy Euronews.

Áleýmettik jelilerde jarııalanǵan beınejazbalarda Belgrad kóshelerinde tútin, órt oshaqtary men jarylys daýystary baıqalady. Polıtsııa men jandarmerııa bıleýshi Serbııalyq progressıvtik partııa keńsesin qorshap, qaqtyǵystardyń aldyn alýǵa tyrysqan. Novı-Sadta juma kúni keshkisin turǵyndar polıtsııa basqarmasy aldyna jınalyp, olarǵa aktsııa kezinde soqqyǵa jyǵylǵan baıkerdi qoldaýǵa kelgen belgradtyq mototsıklshiler qosyldy.

Kralevo qalasynda da narazylar kóshege shyǵyp, polıtsııa partııa keńsesi ornalasqan kósheni qorshaýǵa májbúr boldy.

Serbııa ІІM dereginshe, sońǵy úsh kúnde 121 polıtsııa qyzmetkeri men shamamen 80 azamat jaraqat alǵan. 114 adam ustalyp, olardyń 34-ine qylmystyq is qozǵalǵan. Bılik narazylardy taratý kezinde kúsh qoldanǵanymen, oppozıtsııa polıtsııany shamadan tys sharalar qoldandy dep aıyptaýda.

Eldegi narazylyqtar ótken jyldyń qarasha aıynan beri jalǵasyp keledi. Ol kezde Novı-Sadtaǵy temirjol vokzalynda beton jabyndysy qulap, 16 adam qaza tapqan edi. Oppozıtsııa bılikti «jemqorlyq pen jazasyzdyq mádenıetin qalyptastyrdy» dep aıyptap, qarashadaǵy qaıǵyly oqıǵaǵa mınıstrler men jaýapty sheneýnikterdi jaýapqa tartýdy talap etip otyr.

Aıta keteıik, Serbııa prezıdenti Výchıch kelesi saılaýda kandıdatýrasyn usynbaıdy.