Serbııada tártipsizdikter jalǵasyp jatyr

ASTANA. KAZINFORM – Serbııada prezıdent Aleksandr Výchıchtiń jaqtastary men qarsylastary arasyndaǵy qaqtyǵys ekinshi kúnnen beri jalǵasyp jatyr, dep habarlaıdy DW aqparat agenttigi. 

– 30-ǵa jýyq qalada kem degende 42 polıtsııa qyzmetkeri jaraqat alǵan, onyń 26-sy – Belgradta, jalpy sany 37 narazylyq bildirýshi ustaldy, - dep habarlady Іshki ister mınıstri Ivıtsa Dachıch 15 tamyzǵa qaraǵan túni. 

Eldiń soltústigindegi Novı-Sad qalasynda narazylar Výchıch basqaratyn Serb progressıvti partııasynyń shtab-páterine basyp kirip, eki keńseniń terezelerin syndyryp, jıhazyn alyp ketti. Belgradta úkimet qarsylastaryna otshashýlar atylyp, kóshelerde tártipsizdik ornady. 

Dachıch polıtsııany Novı-Sadtaǵy narazylyq bildirýshilerge qarsy jetkilikti túrde qatań shara qoldanbaǵany úshin synǵa aldy. 

Prezıdent tutqyndaýlar sanyn kóbeıtýge ýáde berdi. Výchıch sonymen qatar polıtsııa, sot jáne prokýratýrada reformalar júrgiziletinin málimdedi. 

Serbııadaǵy narazylyq sherýleri 2024 jyldyń qarashasynan beri Novı-Sad qalasyndaǵy jýyrda jóndelgen temirjol vokzalynyń shatyry qulaǵannan keıin jalǵasyp otyr. Saldarynan 16 adam qaza tapty. 

Qaıǵyly oqıǵadan keıin qurylys mınıstri Goran Vesıch otstavkaǵa ketip, keıin stantsııany qalpyna keltirýge qatysqan taǵy 12 adammen birge ustaldy. Sherýshiler qaıǵyly oqıǵaǵa sybaılas jemqorlyq, salǵyrttyq jáne qurylys kezindegi qaýipsizdik erejelerin saqtamaý sebep bolǵanyn aıtyp, bılikten jaýap berýdi talap etip otyr. 

Narazylyq aktsııalary kezinde Serbııa premer-mınıstri Mılosh Výchevıch otstavkaǵa ketti. 

Buǵan deıin Serbııadaǵy tártipsizdikterden 70-ten astam adam jaraqat alǵanyn jazǵan bolatynbyz.