Serbııada prezıdent saılaýy ótýde

Daýys berýshiler 11 úmitkerdiń arasynan eldi bes jyl boıy basqaratyn kandıdatty tańdaıdy, dep habarlaıdy TASS.

Saılaýǵa eldiń 6,7 mln azamaty qatysýǵa quqyly.

Respýblıkalyq saılaý komıssııasynan habarlaǵandaı, barlyǵy 8 523 saılaý ýchaskesi, sonyń ishinde Kosovo jáne Metohııa avtonomııalyq ólkesiniń aýmaǵynda 90 ýchaske jumys isteıdi.

Qoǵam arasynda júrgizilgen saýalnama nátıjesine sáıkes, halyqtyń 54,3 paıyzy Serbııanyń qazirgi premer-mınıstri Aleksandar Výchıchti qoldap otyr. Ekinshi orynda burynǵy ombýdsmen Sasha ıAnkovıch («Úreısiz Serbııa» azamattar toby) (saılaýshylardyń 12,8%-y) tur. Úshinshi oryndy Lıýbısha Preletachevıch Belyı laqap atymen keńinen tanylǵan áleýmettanýshy-stýdent Lýka Maksımovıch (9,5%) ıelengen.

Serbııa parlamenttik respýblıka bolyp tabylady, bul eldiń memleket basshysy negizinen ókilettik etý fýnktsııalaryn atqarady.