Serbııada QR Táýelsizdiginiń 30 jyldyǵyna oraı poshta markasy shyǵaryldy

BELGRAD. QazAqparat – Serbııada Qazaqstan Táýelsizdiginiń 30 jyldyǵy jáne Qazaqstan men Serbııa arasyndaǵy dıplomatııalyq qatynastardyń ornaǵanyna 25 jyl tolýyna oraı estelik poshta markasy shyǵaryldy, dep habarlaıdy QazAqparat.

QR Syrtqy ister mınıstrliginen málim etkendeı, mereıtoılyq shyǵarylym konvertten jáne poshta blogynan turady.

Konvertte Belgradtaǵy Qalemegdan bekinisinde ornalasqan Jeńimpazǵa eskertkish jáne Nur-Sultanda ornalasqan elimizdiń táýelsizdigin aıshyqtaıtyn «Qazaq Eli» monýmenti beınelengen.

Poshta blogynda eki eldiń astanalary, sondaı-aq Qazaqstannyń (Úlken Almaty kóli men Sharyn shatqaly) jáne Serbııanyń (Ývats ózeni men Djavol Varosh jartastary) ásem kórinisteri beınelengen.

«Qazaqstan Elshiligi bastamashy bolǵan markanyń shyǵarylymyn júzege asyrý kezinde fılatelııa qaǵıdalary men Serbııa pochtasynyń standarttary eskerildi», - delingen SІM málimetinde.

Atalmysh estelik poshta markasyn «Serbııa Poshta» AAQ bas dırektory Zoran Djordjevıch Qazaqstannyń Serbııadaǵy Elshisi Mádı Atamqulovqa tabys etti.