Serbııada kezekten tys parlament saılaýy ótedi
ASTANA. KAZINFORM – Serbııada bir palataly parlament – Halyq skýpşınasyna kezekten tys saılaý ótedi, dep habarlaıdy TASS agenttigi.
Eldiń Respýblıkalyq saılaý komıssııasy 6 mln 451 myń 292 saılaýshyny tirkedi. Olar tórt jyl merzimge 250 depýtatty saılaýy tıis.
Daýys berý ýchaskeleri jergilikti ýaqyt boıynsha saǵat 07:00-de (Astana ýaqytymen 11:00-de) ashylyp, 20:00-de (Astana ýaqytymen kelesi kúngi 00:00-de) jabylady. Saılaý komıssııasynyń málimetinshe, daýys berý barysyn 16 myńnan astam baıqaýshy, onyń ishinde 622 sheteldik baqylaýshy qadaǵalaıdy. 23 qazanda tún ortasynda bastalǵan saılaý aldyndaǵy úgit-nasıhatqa tyıym salý kezeńi ýchaskeler jabylǵanǵa deıin jalǵasady.
Bıýlletenge 18 saılaý tizimi engizilgen. Negizgi básekelester bıliktegi Serbııa progressıvti partııasynyń «Birikken Serbııa» tizimi men «Stýdentter tizimi» bolady dep kútiledi. Birinshi tizimdi 27 qyrkúıekte prezıdenttik qyzmetinen ketken Aleksandr Výchıch basqarady.
«Stýdentter tizimi» 2024 jylǵy qarashada Novı-Sad qalasyndaǵy temirjol vokzalynyń qalqasy opyrylyp, 16 adam qaza tapqan qaıǵyly oqıǵadan keıin Serbııada bastalǵan narazylyq qozǵalysy negizinde qalyptasty. Demonstranttar bılikti sybaılas jemqorlyqqa jáne oqıǵanyń tergelýin jasyrýǵa tyrysty dep aıyptady. «Stýdentter tiziminiń» resmı jetekshisi joq, alaıda tizimniń basynda Novı-Sad qalasynan shyqqan kardıolog Ilııa Srdanovıch tur.
Sońǵy saılaý aldyndaǵy saýalnamalarǵa sáıkes, Serbııa progressıvti partııasy men «Stýdentter tiziminiń» reıtıngi shamamen 40 paıyzdy quraıdy.
Sondaı-aq eldiń vıtse-premeri ári ishki ister mınıstriniń mindetin atqarýshy Ivıtsa Dachıch basqaratyn Serbııa sotsıalıstik partııasynyń, Mılosh Iovanovıchtiń oppozıtsııalyq Serbııanyń jańa demokratııalyq partııasy tóńireginde qurylǵan «Naǵyz ońshyldar» tiziminiń jáne Belgradtyń burynǵy meri Dragan Djılas jetekshilik etetin Bostandyq pen ádilet partııasy negizinde jasaqtalǵan eýropashyl partııalar koalıtsııasynyń parlamentke ótý múmkindigi bar. Bul kúshter 3 paıyzdyq saılaý mejesinen ótýge úmitti.
Dachıchtiń partııasy kóp jyl boıy Serbııa progressıvti partııasynyń koalıtsııalyq seriktesi bolyp keldi. Al qalǵan eki saıası blok «Stýdentter tizimimen» yntymaqtasý múmkindigin qarastyrǵan. Parlamentte 3 paıyzdyq mejege baǵynbaıtyn ulttyq azshylyqtardyń partııalary da ókildik etedi.
Výchıch kezekten tys saılaý ótkizý úshin parlamenttiń burynǵy quramyn taratyp, keıin bıliktegi partııanyń premer-mınıstrlikke kandıdat bolý týraly usynysyn qabyldady. Ol prezıdenttik qyzmetten ketýin saılaý naýqanyn qarapaıym azamat mártebesinde ótkizý nıetimen túsindirdi.
Keıin saıasatker saılaýdan soń Serbııada jappaı kóshe tártipsizdikterine ulasýy múmkin «frantsýz stsenarııine» jol bermeıtinin málimdedi.
Aıta keteıik, buǵan deıin Serbııa prezıdenti Aleksandr Výchıchtiń qyzmetinen ketkenin jazdyq.
Sondaı-aq Qazaqstan men Serbııa áskerı-tehnıkalyq yntymaqtastyqty kúsheıtýdi qolǵa aldy.
