Serbııada Qazaqstannyń kórikti jerleri týraly derekti fılm kórsetiledi
ASTANA. KAZINFORM - Qazaqstannyń Serbııadaǵy Elshiligi serb «TV Most» telearnasymen serb tiline aýdarylǵan Qazaqstan týraly derekti fılmder toptamasyn kórsetý jóninde mańyzdy kelisimge qol jetkizdi. Bul týraly Syrtqy ister mınıstrligi habarlady.
Qazaqstannyń «Arsha Medıa» prodıýserlik ortalyǵy túsirgen derekti fılmder serııasy Serbııa jáne aımaqtyq kórermenderdi Qazaqstannyń biregeı tabıǵı sulýlyǵymen tanystyrady. Kórermender Mańǵystaý men Sharyn shatqaldarynyń ásem kelbetin, Altaı ormandarynyń baılyǵyn, Kókshetaý men Kólsaı kólderiniń kórkin, sondaı-aq, Túrkistannyń sáýlettik murasyn tamashalaı alady. Fılmderde, sonymen qatar Almaty men Astana megapolısteriniń zamanaýı tynysy beınelengen.
Budan bólek, týyndylarda elimizdiń tarıhı jáne mádenı nysandarynyń san alýandyǵy kórsetilip, Qazaqstannyń baı tabıǵaty men mádenı murasyna tereń sholý jasalady.
Kelisimge sáıkes, kórsetilim Serbııa aýmaǵynyń basym bóligin qamtıtyn «TV Most» telearnasynda 2025 jylǵy 1 qarashada bastap júzege asyrylady. Fılmder aldaǵy eki jyl ishinde birneshe ret kórsetiledi dep josparlanyp otyr.
Sonymen qatar «TV Most» bul fılmderdi kórsetý quqyǵyn óńirdegi basqa telearnalarǵa, sonyń ishinde Chernogorııa men Bosnııa jáne Gertsegovınaǵa bermek. Bul óz kezeginde aýdıtorııany barynsha keńeıtip, Qazaqstanǵa degen qyzyǵýshylyqty arttyra túsetin bolady.
Atalǵan bastamanyń erekshe mańyzy – bul fılmder 2025 jylǵy 3 qarashada Astana-Belgrad baǵyty boıynsha ashylatyn jańa tikeleı áýe reısin ilgeriletýge yqpal etetin tıimdi platformaǵa aınalady. Sondaı-aq joba Qazaqstannyń batyldyǵy men ashyqtyǵyn aıqyndaıtyn Born Bold atty halyqaralyq ımıdjdik naýqanyn nasıhattaýda da qoldanylatyn bolady.
Aıta keteıik, Qazaqstan men Grýzııa volonterlik jobalar men kınofılmder almasýdy josparlap otyr.