Serbııada 44 qazaqstandyq kompanııa isteıdi

ASTANA. KAZINFORM — Serbııada qazaqstandyq kapıtal qatysqan 44 kompanııa men 73 jeke kásipker tirkelgen. Bul týraly Serbııanyń halyqaralyq ekonomıkalyq yntymaqtastyqty damytý mınıstri Nenad Popovıch Qazaqstan–Serbııa Іskerlik keńesiniń alǵashqy otyrysynda habarlady. 

Nenad Popovıchtiń aıtýynsha, sońǵy jyldary eki el arasyndaǵy taýar aınalymy turaqty ósim kórsetip keledi. 2025 jyly saýda kólemi 7%-ǵa artqan jáne shamamen 117 mıllıon AQSh dollary bolǵan.

— Qoldanystaǵy erkin saýda kelisimi eki el arasyndaǵy ekonomıkalyq baılanysqa turaqty negiz beredi. Endi osy negizdi naqty jobalar men kásipkerlerdi qoldaý sharalary arqyly nyǵaıtý mańyzdy, — dedi Popovıch.

Mınıstr Qazaqstannyń Serbııadaǵy kásipkerlik belsendiligi týraly málimet berdi.

— Qazirgi tańda Serbııada qazaqstandyq kapıtal qatysqan 44 kompanııa men 73 jeke kásipker tirkelgen. Bul az kórsetkish, sondyqtan bizdiń mindetimiz — bul sandy arttyrý jáne serbııalyq kásipkerlerdi Qazaqstanǵa tartý, — dedi ol.

Popovıchtiń aıtýynsha, Serbııa Prezıdentiniń Astanaǵa sapary kezinde 8–10 jańa kelisimge qol qoıylýy josparlanyp otyr. Bul eki el arasyndaǵy ekonomıkalyq baılanystardy odan ári keńeıtýge múmkindik beredi.

Eske salsaq, Serbııa Prezıdenti Aleksandr Výchıch Memleket basshysy Qasym-Jomart Toqaevtyń shaqyrýymen 26–27 aqpanda Qazaqstanǵa resmı saparmen keledi.