Serbııada 1 qarashada qaıta daýys berý ótedi
ASTANA. KAZINFORM — Serbııada 25 qazanda ótken kezekten tys parlament saılaýy aıasynda 1 qarashada 53 saılaý ýchaskesinde qaıta daýys berý ótedi. Bul týraly Kazinform agenttigi TASS-qa silteme jasap habarlady.
Bul jóninde Serbııanyń Respýblıkalyq saılaý komıssııasy málimdedi.
Vedomstvonyń málimetine qaraǵanda, saılaýshylardyń daýystaryn sanaý nátıjesin anyqtaý múmkin bolmaǵan ýchaskelerde qaıta daýys berý ótedi. Osy ýchaskelerdegi alǵashqy daýys berý qorytyndylary jaramsyz dep tanylǵan.
Qazirgi ýaqytta saılaý komıssııasy ýchaskelerdiń shamamen 99 paıyzynan túsken bıýlletenderdi eseptep shyqqan.
Qaıta daýys berý saılaýdyń jalpy nátıjesine áser etpeıdi. Alaıda túpkilikti qorytyndyny shyǵarý men jańa úkimetti jasaqtaý protsesin birshama kesheýildetýi múmkin.
Serbııada kezekten tys parlament saılaýy 25 qazanda ótti. Azamattar eldiń bir palataly parlamenti — Halyq skýpşınasynyń 250 depýtatyn saılady.
Aldyn ala nátıjeler boıynsha, stýdentter qozǵalysy qoldaıtyn «Stýdentter tizimi» 141 depýtattyq mandat alýy múmkin. Al burynǵy prezıdent Aleksandr Výchıchtiń «Birikken Serbııa» saıası birlestigi 103 orynǵa ıe bolýy yqtımal.
Parlamentte basymdyqqa ıe bolý úshin keminde 126 depýtattyq oryn alý qajet.
Buǵan deıin Serbııanyń burynǵy prezıdenti Aleksandr Výchıch kezekten tys parlament saılaýynda óziniń saıası kúshiniń jeńilgenin moıyndaǵanyn habarlaǵanbyz.
Serbııa progressıvti partııasynyń saılaý shtabynda sóılegen Výchıch daýys berýdiń túpkilikti nátıjesi áli belgisiz ekenin, alaıda qolda bar derekter óz blogynyń jeńilip jatqanyn kórsetetinin aıtty. Onyń sózinshe, «Stýdentter tizimi» 135-140 depýtattyq mandatqa ıe bolýy múmkin. Al ózi basqaratyn tizim shamamen 105 mandat alady dep boljanǵan.
