Serbııa-Vengrııa shekarasynda atystan úsh adam qaza tapty

Serbııanyń Horgosh aýyly mańynda mıgranttar arasynda atys boldy. Oqıǵa saldarynan úsh adam mert bolyp, bireýi jaraqat aldy. Polıtseıler oqıǵanyń mán-jaıyn anyqtap jatyr. Kazinform agenttigi bul týraly Euronews-ke silteme jasap habarlaıdy.  

Oqıǵa zańsyz mıgranttar lager qurǵan burynǵy aýylsharýashylyq kásipornynyń qaraýsyz ǵımaratynda bolǵan.

Taǵy bir mıgrant jaraqat aldy. Ol aýrýhanaǵa jiberildi. Shekara aımaǵynan úzdiksiz atys estip, alańdaǵan jergilikti turǵyndar ol týraly áleýmettik jelilerde habarlady.

«Qalaı atty deseńizshi. Kimder ekenin bilmeımin, áldebir top pa, álde qurylym ba, biraq uzaq atysty. Tańǵa deıin jalǵasty», - deıdi jergilikti turǵyn.

Oqıǵa ornyna polıtsııa jasaǵy jiberildi. Tergeý amaldary bastaldy.

Atysqa mıgranttar arasynda Vengrııa shekarasyn zańsyz kesip ótkeni úshin kontrabandashylarǵa kim tóleıtini týraly daý sebep bolýy múmkin.