Serbııa úshin Qazaqstanmen yntymaqtastyqty arttyra túsý asa mańyzdy - Aleksandr Výchıch
ASTANA. QazAqparat - Serbııa úshin Qazaqstanmen yntymaqtastyqty arttyra túsý asa mańyzdy. Bul týraly búgin Aqordada Elbasy Nursultan Nazarbaevpen kelissózderden keıingi birlesken málimdeme barysynda Serbııa Prezıdenti Aleksandr Výchıchpen aıtty, dep habarlaıdy QazAqparat tilshisi.
«Biz saıası jáne ekonomıkalyq yntymaqtastyǵymyzdyń barlyq mańyzdy máselelerin talqyladyq. Qatty tańdanysymdy týdyratyn Astanaǵa taǵy da kelgenim úshin qýanyshtymyn. Menińshe, Ortalyq Azııadada Astanadaı qarqyndy jyldamdyqpen ózgerip, jańǵyra túsken qala joq. Árıne, kózqarasy ashyq, energııasy mol jáne óz isine jan-tánimen berilgen Prezıdent N.Nazarbaevtyń arqasynda Qazaqstan qol jetkizip otyrǵan tabystarǵa da súısinemin», - dedi mártebeli meıman.
Osy rette Aleksandr Výchıch Serbııa úshin Qazaqstanmen yntymaqtastyqty arttyra túsý óte mańyzdy ekendigin basa aıtty.
«Yntymaqtastymyzǵa beıbitshilik, turaqtylyq, ekonomıkalyq gúldený, ınvestıtsııa tartý, azamattardyń ekonomıkalyq qýatyn nyǵaıtý, qoǵamdy jańǵyrtý, eldiń qorǵanys qabilettiligin arttyrý ustanymdary negiz bolyp qalanǵan. Bizdiń elderimizdiń arasyndaǵy qarym-qatynas óte jaqsy, konstrýktıvti jáne ony odan ary nyǵaıtý úshin zor keleshekkke ıe. Búgingi kezdesý de soǵan dáneker bola túsedi dep oılaımyn», - dedi Serbııa Prezıdenti.
Aıta keteıik, Serbııa basshysy Qazaqstan Prezıdenti Nursultan Nazarbaevtyń shaqyrýymen resmı saparmen kelip otyr. Búgin mártebeli meıman Aqordada Nursultan Nazarbaevpen kezdesý ótkizdi.
Kezdesý barysynda Nursultan Nazarbaev Serbııa Prezıdentin «Dostyq» ordenimen marapattady.
Al Aleksandr Výchıch Qazaqstan Prezıdentine óz eliniń eń joǵary nagradasy «Serbııa Respýblıkasy» ordenin tabys etti.
Sapar aıasynda Aleksandr Výchıch Qazaqstan-Serbııa iskerlik forýmyna, Álemdik jáne dástúrli dinder kóshbasshylarynyń VI seziniń ashylýyna qatysady dep josparlanǵan.
Serbııa prezıdentiniń sapary barysynda birqatar mańyzdy qujattarǵa qol qoıylmaq. Onyń ishinde Qazaqstan men Serbııa úkimetteri arasyndaǵy qylmysqa qarsy kúrestegi yntymaqtastyq týraly kelisim, sondaı-aq, Qazaqstannyń Qoǵamdyq damý mınıstrligi men Serbııanyń jastar saıasaty jáne soprt mınıstrligi arasyndaǵy ózara túsinistik týraly memorandým bar.
