Serbııa Respýblıkasy sý tasqynynan qıraǵan baspana qurylysyna 1 mıllıon eýro bóldi
ASTANA. KAZINFORM – «Qazaqstan halqyna» qorynyń esepshotyna Serbııa úkimetinen sý tasqynnan zardap shekken aýdandarda úı salýǵa 1 mıllıon eýro tústi. Bul sheshim eki el arasyndaǵy uzaq merzimdi seriktestik pen dostyqtyń sımvoly bolyp tabylady. Bul týraly Qazaqstan Prezıdenti janyndaǵy Ortalyq kommýnıkatsııalar qyzmetinen málim etti.
«Bul járdem eki el arasyndaǵy yntymaq deńgeıin kórsetedi jáne sheteldik donorlardyń bizdiń qyzmetimizge artyp kele jatqan senimi men kómekti bólýdegi ashyqtyqty kórsetedi», - dedi «Qazaqstan halqyna» qorynyń basqarma tóraǵasy Bolat Jámishev.
Jalpy, 2024 jyldyń 10 mamyrdaǵy jaǵdaı boıynsha tabıǵı apattan qıraǵan turǵyn úılerdi salýǵa qordan bólingen 10 mıllıard teńgeden bólek qosymsha 5,3 mıllıard teńge jınaldy.
2024 jylǵy 6 mamyrda eki eldiń basshysy Qasym-Jomart Toqaev pen Aleksandr Výchıch telefon arqyly sóılesken bolatyn. Prezıdentter ekijaqty yntymaqtastyqty jandandyrý, buryn qol jetkizilgen kelisimderdi júzege asyrý jáne Qazaqstan Prezıdentiniń Belgradqa aldaǵy saparyn uıymdastyrý máselelerin talqylady.
Qazaqstan 2014 jyly alapat sý tasqynyna baılanysty Serbııaǵa shatyr, dári-dármek pen eń qajetti zattardy jiberip, gýmanıtarlyq kómek kórsetken edi.
