Serbııa prezıdentiniń ushaǵy apatty jaǵdaıda qondy
ASTANA. QazAqparat - Serbııa prezıdenti Tomıslav Nıkolıchtiń ushaǵy dvıgatelindegi aqaýlyqqa baılanysty Belgrad áýejaıyna oralýǵa májbúr boldy, dep habarlaıdy Vestı.
Memleket basshysy 17 sáýirde Vatıkanǵa barýy tıis bolatyn, alaıda, ushaǵynyń tehnıkalyq aqaýlaryna baılanysty onyń bul sapary keıinge qaldyryldy. Prezıdenttiń keńesshisi Stanıslava Pak onyń saparynyń ázirge naqty belgisiz merzimge keıinge qaldyrylǵanyn rastady.
Beıresmı málimetterge súıensek, "Falkon-50" ushaǵynyń dvıgatelderiniń biri Adrıat teńiziniń ústinen ushýy kezinde isten shyqqan. Bul kezde ol 10 myń metr bıiktikte ushyp bara jatqan edi. Tájirıbeli ushqyshtyń áýe kemesin basqarýdy baqylaı alýynyń arqasynda ol Belgradqa qaıta oralǵan.
