Serbııa Prezıdenti Qazaqstannyń qorǵanys kásiporyndarynda boldy

ASTANA. QazAqparat - Serbııa Prezıdenti Aleksandr Výchıch Astanaǵa sapary aıasynda búgin Qazaqstannyń qorǵanys-ónerkásiptik kesheniniń kásiporyndaryn aralady, dep habarlaıdy QazAqparat «Qazaqstan ınjınırıng» AQ baspasóz qyzmetine silteme jasap. 

«Qazaqstan Paramaýnt Injınırıng» JShS bas dırektory Erbol Sálimov A. Výchıch bastaǵan delegatsııany zaýyttyń óndiristik múmkindikterimen tanystyrdy, sonymen qatar onyń áleýeti týraly aıtyp berdi. 

Serbııa Prezıdenti Astanada shyǵarylatyn brondalǵan «Arlan» men «Barys 8h8» kólikterine qyzyǵýshylyq tanyta otyryp, «Qazaqstan Paramaýnt Injınırıng» zaýytynyń jabdyqtalýyn jáne óndiristik áleýetin joǵary baǵalady. 


A. Výchıch bastaǵan delegatsııa, sondaı-aq qorǵanys salasyndaǵy elektrondyq-optıkalyq quraldardy shyǵaratyn zaýytta boldy. «KAE» JShS shyǵaratyn ónimderdiń ishinde ınfraqyzyl lınzalar, teplovızorlar, tikushaqtardy jetildirý jabdyqtary serbııalyq basshylyqtyń erekshe nazaryna ilikti.  

Serbııalyq tarap qorǵanys salasynda birqatar baǵyttar boıynsha birlesken jobalardy júzege asyrýǵa zor múddellilik tanytty. 
«Qazaqstan Paramaýnt Injınırıng» JShS - mınaǵa qarsy MRAP úlgisi boıynsha brondalǵan dóńgelekti kólikterdi shyǵaratyn alǵashqy Ortalyq Azııalyq zaýyt. 2016 jyly jeltoqsanda zaýyt «Arlan» brondalǵan kólikterin qazaqstandyq áskerge jetkizý boıynsha kelisimshartty tolyq oryndap shyqty. 



«KAE» JShS túnde kóretin qurylǵylardy, teplovızorlyq kózdeýishterdi, elektrondyq platalar men optıkalyq lınzalardy shyǵarady.  Onyń ónimderi búginde Qarýly Kúshterdiń túrli jasaqtarynda keńinen qoldanylýda.