Serbııa prezıdenti Qazaqstanǵa resmı saparmen keledi
ASTANA. QazAqparat - Serbııa prezıdenti Aleksandr Výchıchtiń sapary 8-10 qazanǵa josparlanyp otyr, dep xabarlaıdy QazAqparat tilshisi.
QR Syrtqy ister mınıstrliginiń baspasóz xatshysy Aıbek Smadııarovtyń aıtýynsha, Serbııa basshysy Qazaqstan Prezıdenti Nursultan Nazarbaevtyń shaqyrýymen keledi.
«9 qazanǵa Aleksandr Výchıchtiń Qazaqstan Prezıdentimen kezdesý josparlanǵan. Budan bólek, mártebeli meıman Qazaqstan-Serbııa iskerlik forýmyna, Álemdik jáne dástúrli dinder kóshbasshylarynyń VI seziniń ashylýyna qatysady. Al bir kún buryn, ıaǵnı 8 qazanda Qazaqstan men Serbııanyń ekonomıka jónindegi úkimetaralyq komıssııanyń ekinshi otyrysy ótedi degen jospar bar. Atalǵan is-sharanyń kún tártibine saýda-ekonomıkalyq baılanystar, geologııa, kólik, týrızm, qurylys jáne aýyl sharýashylyǵy máseleleri kiredi. Qazaqstan tarapynan komıssııany QR Ultyq ekonomıka mınıstri Tımýr Súleımenov, al Serbııa tarapynan ekonomıka mınıstri Goran Knejevıch basqarady», - dedi A.Smadııarov Astanada ótken baspasóz máslıxatynda.
Resmı aqparatqa sáıkes, aǵymdaǵy jyly alty aıdyń ishinde Qazaqstan men Serbııa arasyndaǵy saýda-sattyqtyń kólemi 16,7 mln AQSh dollaryn qurady. Qazirgi kezde Qazaqstanda 20-dan astam serbııalyq kompanııa tirkelgen. Olardyń basym bóligi kóterme jáne bólshek saýdamen, sondaı-aq, turǵyn-úı men kommertsııalyq nysandardyń qurylysymen aınalysady.
«Serbııa prezıdentiniń sapary barysynda birqatar mańyzdy qujattarǵa qol qoıylady. Sonyń ishinde Qazaqstan men Serbııa úkimetteri arasyndaǵy qylmysqa qarsy kúrestegi yntymaqtastyq týraly kelisim, sondaı-aq, Qazaqstannyń Qoǵamdyq damý mınıstrligi men Serbııanyń jastar saıasaty jáne soprt mınıstrligi arasyndaǵy ózara túsinistik týraly memorandým bar», - dep atap kórsetti A.Smadııarov.
