Serbııa Prezıdenti dinı dıalogty jolǵa qoıǵan Astanadaǵy sezge joǵary baǵa berdi
«Álemdik qaýipsizdik pen turaqtylyqty qamtamasyz etý úshin qolymyzdan kelgenniń bárin de jasaımyz. 2003 jyldan bergi Qazaqstan Prezdentiniń álemdik din basshylarynyń basyn qosý týraly bastamasynyń arqasynda barlyq din basshylary ózderiniń qundy ıdeıalaryn aıtyp keledi. Islam dini, Pravoslav dini, ózge de dinderdiń ókilderi bas qosqan osy jerde meniń de qandaı múddem bar ekenin de aıtqym keledi. Naqtyraq aıtqanda, bárimizdiń múddemiz, mindetimiz - órkenıetti qorǵaý. Osy forýmǵa qyzyǵýshylyq tanytýymyzdyń sebebi - bul jerde turaqty dıalogtyń bolýy», - dedi Aleksandr Výchıch.
Serbııa Respýblıkasynyń prezıdenti álemdik jáne dástúrli dinder kóshbasshylary árbir adamdy jamandyqtan qutqaryp, jaqsylyqqa bastaıtynyn, rýhanı qundylyqtardy qorǵap kele jatqanyn tilge tıek etti.
«Din lıderleri qazirgi tańda álemdik deńgeıdegi bedeldi tulǵalar bolyp tabylady. Sondyqtan, olardyń aıtqan ıdeıalary, negizgi ilimderi qundylyqtarǵa negizdeledi. Geosaıasat ókilderiniń din basshylarynyń sózderine qulaq aspaıtyn kezderi bar. Al túptep kelgende álemdik din basshylarynyń ıdeıasy - halyqaralyq quqyqqa negiz bolyp otyrǵanyn aıta ketý kerek. Árbir adamnyń jeke basyn syılamaıynsha biz turaqtylyqqa qol jetkize almaımyz», - dedi ol.
Eske sala ketsek, elordada QR Prezıdenti Nursultan Nazarbaevtyń tóraǵalyǵymen Álemdik jáne dástúrli dinder kóshbasshylarynyń VI sezi ótip jatyr.
Sez barysynda Qazaqstan Prezıdenti Nursultan Nazarbaev memleketter arasyndaǵy senimdi nyǵaıtyp, qaýipsiz álemdi qalyptastyrý jolynda konfessııaaralyq, órkenıetaralyq dıalog ortalyǵyn bekitýge daıyn ekenin málimdegen bolatyn.
Sondaı-aq Qazaqstan Prezıdenti Vatıkannyń papalyq keńesine «Dinaralyq dıalogqa úles qosqany» úshin syılyǵyn tabys etti.
