Serbııa prezıdenti Výchıch saılaý kúnin 10 kún ishinde jarııalaıdy
ASTANA. KAZINFORM – Serbııada saılaý ótkizý merzimi aldaǵy 10 kún ishinde anyqtalady. Bul týraly el prezıdenti Aleksandar Výchıch Informer telearnasynyń efırinde málimdedi, dep habarlaıdy TASS agenttigi.
– Qalaı bolǵanda da sheshim shamamen on kún ishinde qabyldanady. Saılaý týraly aıtqanda, eshqandaı aıla-sharǵy joq. Munda halyq, adamdar óz bolashaǵyn qalaı kóretinin jáne ony kimge senip tapsyratynyn ózi sheshedi. Menińshe, saılaý – óte mańyzdy dúnıe. Árdaıym aıtyp júrgenimdeı, memleket oıynshyq emes, sol sııaqty saılaý da asa mańyzdy, – dedi Výchıch.
Serbııa basshysy azamattar óz bolashaǵyn tańdaǵanda el múddesin «eń jaqsy qorǵaıtyn jáne saqtaıtyn» kúshterdi qoldaýy tıis ekenin atap ótti. Onyń aıtýynsha, bul jeke óziniń nemese basqa da bılik ókilderiniń saıası taǵdyry emes, mıllıondaǵan adamnyń bolashaǵy týraly másele.
Prezıdent ótken kezeńde kóptegen jumystar atqarylǵanyn, al ekonomıkalyq tsıkl erekshe naqty nátıjeler kórsetkenin aıtty. Alaıda álemdegi jaǵdaıdyń ózgerýine baılanysty birqatar protsesterdi ózgertip, jedeldetý qajettigin jetkizdi.
Buǵan deıin serbııalyq kóshbasshy kezekten tys parlamenttik saılaý eki aıdan keıin nemese jarty jyldan soń ótýi múmkin ekenin joqqa shyǵarmaǵan. Al Serbııa halyq skýpşınasynyń spıkeri Ana Brnabıch bıliktegi Serb progressıvti partııasy aldaǵy parlamenttik saılaýda Výchıchti premer-mınıstrlikke kandıdat retinde usynatynyn málimdegen.
Eske sala ketsek, byltyr Serbııada merziminen buryn parlamenttik saılaý 2026 jyly ótetinin habarladyq.
